طالبانو تېره ورځ (دوشنبه) د بغلان ولایت د تاله او برفک ولسوالۍ د دان ایستمه سیمه کې د یو ښوونځي له سوځولو وروسته، د دغې ولسوالۍ ۷۰ تنه اوسېدونکي په دُرو وهلي دي.
ویل کېږي، چې دغه ۷۰ تنه ټول شیعه مذهبي وو.
د دان ایستمه کلي یو قومي مشر ارباب بسم الله سلام وطندار ته وویل، چې دغه ۷۰ تنه شیعه مذهبي د طالبانو د مشهور قومندان ملا نصرالله په امر وهل شوي دي.
د تاله او برفک ولسوال فیض محمد امیري د یادو ۷۰ تنو وهل او د ښوونځي سوځول تاییدوي، خو دا قضيه هغو حلقو پورې تړي، چې په دغه ولسوالۍ کې مذهبي اختلافات راپیدا کوي.
امیري زیاتوي، چې د قومي مشرانو په منځګړيتوب یې دغه قضیه حل کړې ده.
دا پېښه په داسې حال کې رامنځته کیږي، چې څه موده وړاندې ناپېژاندو کسانو د دغه ولایت د ډنډغوري په سیمه کې د ۹ جوماتونو محرابونه سوځولي وو، خو څه وخت وروسته طالبانو یو رواني کس د همدې موضوع په تور په ډزو ووژلو.
