مملکت باشقرهلاووچیلیک اداره‌سی‌نینگ مسؤوللری، شهر قوریش وزیرلیگی‌نینگ باشقه 20 ملازمی مذکور وزیرلیک‌ده فسادگه علاقه‌لری بارلیگی گمان قیلینگن.
باشقرهلاووچیلیک اداره‌سی‌نینگ سوزلاووچی‌سی بصیر عزیزی‌نینگ بیر خبری ییغین‌ده ایتیشیچه، شهر قوریش وزیرلیگی‌نینگ آلتی ملازمی اوستیدن اوتکزیلگن تیکشیرووده اوشبو وزیرلیک‌ده میلیونلب دالر حیف‌ومیل بولگنی انیق‌لنگن.
جمهور رییس محمد اشرف‌غنی بوندن نیچه وقت آلدین شهر قوریش وزیرلیگی آلتی رسمی‌سی‌نینگ فسادگه قولی بارلیگی سبب ایش‌دن آلیب مملکت‌دن چیقمس لیگینی بیلدیرگن ایدی.
شونینگ‌دیک بو شخص‌لر قوریلیش لایحه‌لر، حکومت رسمیلری همده یقین قرینداش‌لریگه آپارتمان ترقه‌تیش و صفت‌سیز بلاک‌لرنی قوریش اوچون عدلی وقضایی اداره‌لرگه تانیشتیریلگن‌لر.
مرکزی شهر قوریش رییسی احمدشاه همت، املاک رییسی محمدامین امین، اویلر قوریش تصدی رییسی احمدنواز بختیار، برنامه توزیش رییسی گل‌رحیم زیارمل، آپارتمانلر اداری و مالی مسؤولی سیدامان‌الله سادات و آپارتمانلر انسجام اداره‌سی مسؤولی محمدامین قانع‌لر وزیرلیک‌نینگ فسادگه قول اورگن ملازملریدن سنه‌له‌دی.
حادثه‌دن آلتی کون سونگ احمدنواز بختیار، محمدامان سادات و محمد امین قانع لر بدخشان ولایتی ارقه‌لی تاجیکستان‌گه قاچیب اوته‌دیگن‌ده ولایت چیگره پولیسی تامانیدن قول‌گه آلینگن ایدی.
حاضر ایسه باشقرهلاووچیلیک سوزلاووچی‌سی مذکور وزیرلیک‌ده باشقه فساد موجودلیگی‌دن هم پرده کوتارگن. ایتیلیشیچه، وزیرلیک‌نینگ باشقه 20 ملازمینی هم فسادگه قولی بار.
جناب عزیزگه کوره، وزیرلیک‌نینگ آلتی ملازمی دوسیه‌سی تکمیل ایتیلگن. او، مملکت عالی محکمه‌سی‌دن اوشبو شخص‌لر اوچون عدالت تطبیق ایتیلیشی‌نی سوره‌گن.
عزیز، کابل بانک اداری فسادی‌دن سونگ، شهر قوریش وزیرلیگی‌نینگ آلتی کیشی ملازم قول اورگن فساد مملکت‌ده ایکینچی ییریک فساد سنه‌له‌دی.
اوتگن هفته دولت باشقره‌لاووچیلیگی مذکور شخص‌لرنینگ دوسیه‌سی عالی محکمه‌گه یوباریلیشی‌نی ایتگن ایدی.
