ځېنې شنونکي وايي، چې د قوي ارادې نشتوالي او په ارګ کې ځېنې موجودۍ کړۍ د ټاکنیز نظام د سمون او د غوراوي کمېټې د کار د پیلولو مخنیوی کوي.
د غوراوي کمېټه درې میاشتې مخکې په ټاکنیز نظام کې د سمون راوستلو د طرحې پر اساس جوړه شوه.
خو د ولسي جرګې له لوري د غوراوي کمېټې د فرمان ردولولو سره د دې کمېټې غړیو اعلان وکړ، تر هغې به چارې نه پیلوي تر څو چې دغه قانوني ستونزه حل نه شي.
د چارو شننونکی مجیب خلوتګر سلام وطندار ته وویل، کله چې رسنۍ د غوراوي کمېټې د کار د پیل په اړه په ارګ فشار راوړي، ارګ رسنیو ته د تقنیني فرمان مسله مخکې کوي.
دی وايي، په اصل کې ارګ په ټاکنیز نظام کې د سمون راوړلو په اړه اراده نه لري.
خلوتګر زیاتوي، تر هغې پورې چې دا ډول خلک په ارګ کې د ننه موجود وي، هیڅکله به په ټاکنیز نظام کې سمون را نه وستل شي.
خو په ورته وخت کې د ولسمشرۍ ماڼۍ اعلان کړی دی، چې د ټاکنیز نظام د سمون او په ځانګړي ډول د غوراوي کمېټې د چارو د پيل له پاره دویم تقنیني فرمان چمتو شوی دی او د کابینې له خوا تایید شوی دی.
خو ولسمشر د دغه فرمان له صادرولو مخکې د ولسي جرګې له استازو سره خبرې پیل کړي دي، چې تر څو دغه فرمان هم د تېر هغه په څېر له برخلیک سره مخ نه شي.
د غوراوي کمېټې غړي نعیم ایوب زاده وویل، چې په ولسمشرۍ ماڼۍ کې د نظرونو اختلاف او د وخت ضایع کول د دې لامل شوي دي، چې ولسمشر دغه فرمان وځنډیږي.
ایوب زاده وايي، چې که حکومت په ټاکنیز نظام کې د سمون راوستلو له پاره قوي اراده ولري ولسي جرګه به هیڅ وخت د ولسمشر فرمان رد نه کړي.
