د بېلابېلو کورنیو او نړېوالو رسنيو له لوري د طالبانو مشر ملا محمد عمر د ژوندليک خپرولو څخه وروسته، یو شمېر سياسي شنونکي په دې اند دي، چې طالبانو د خپل رهبر د ژوندليک په خپرولو سره دا ثابته کړه، چې رهبر يې ژوندی دی.
طالبانو په بې صبرانه توګه د ملا محمد عمر ژوندلیک د ده د رهبرۍ د ۱۹ مې کلیزې په مناسبت خپور کړ.
د يادې ډلې د رهبر ژوندلیک خپرېدل په داسې حساس وخت کې ځينې پوښتنې راولاړې کړې دي، چې ولې طالبانو په دې وخت د خپل امير ژوندلیک خپور کړ؟
د ملاعمر ژوند لیک په ۵ زره کلمو کې د امارت اسلامي په سایت کې خپور شوی دی.
د طالبانو د رهبر په ژوندلیک کې له ( R.P.G7) ډوله راکټ څخه یادونه شوې، چې د ملاعمر د خوښې وړ سلاح ده.
همدارنګه په دغه ژوندليک کې ليکل شوي، چې نوموړی شوخ طبعيت لري او ساده ژوند يې خوخښيږي.
شنونکي وايي، چې د سیاسي خلکو د ژوندلیک خپرول په ځانګړي توګه د سیاسي او نظامي رهبرانو د هغوی د کارونو په پېل کې خپریږي.
د سیاسي چارو شنونکی محمد عاصم په دې اړه وايي، د طالبانو دا کار یو شمېر پوښتنې راولاړوي، چې نوموړی په کلونو د سیاسي او نظامي چارو رهبري کړې، مګر طالبانو اوس د ده ژوند لیک خپروي.
دی زياتوي، دغه ډله ولې مخکې له دې دا کار نه تر سره کاوه ؟
محمد عاصم وايي، ښايي طالبان په دې کار سره ځانګړې سياسي موخې ولري.
اخوا یو شمېر نور د سياسي چارو کارپوهان بيا په دې باور دي، چې د ملاعمر د ژوندلیک خپرولو څخه د طالبانو موخه د داعش ډلې پر وړاندې درېدل دي.
د کابل پوهنتون د حقوقو او سياسي علومو استاد نصرالله ستانکزی په دې اند دی، چې طالبانو له لوري د ملاعمر د ژوندلیک خپرولو څخه هدف دا دی، چې خلکو ته د خپل امير د مرګ ګنګوسه غلطه ثابته کړي.
ستانکزي زیاته کړه، په دې وروستیو کې داسې ګنګوسې خپرې شوې وې، چې ګوندی ملا عمر مړ شوی.
دی وايي، د ملاعمر د مرګ اوازه د دې لامل شوه، چې زيات طالبان له دغې ډلې جلا شي.
د کابل پوهنتون استاد زياتوي طالبان غواړي، څو خپل رهبر ژوندی وښيي او نورو ته دا پېغام ورسوي، چې له داعش ډلې سره دې نه يوځای کيږي.
په ورته وخت کې د سیاسي چارو بل شنونکی وحید مژده په دې اند دی، طالبانو په دې کار سره وغوښتل د خپلو پلويانو شکونه له منځه يوسي.
نوموړي سلام وطندار ته وویل، چې د ملاعمر د ژوند ليک له خپرېدو څخه وروسته نور به ځينې طالبان دا فکر نه کوي، چې فرمانونه د بل چا له لوري صادريږي.
د دې ژوندلیک پر بنسټ ملا محمد عمر په ۱۳۳۹ م لمريز کال کې د کندهار ولایت د خاکریز ولسوالۍ د چاه همت په کلي کې زيږېدلی دی.
په ژوندليک کې د ۱۹۸۳ څخه تر ۱۹۹۱ کلونو پورې د ده د جګړو يادونه شوې او ويل شوي، چې د روسانو پر وړاندې په جګړه کې څلور ځلې ټپي شوی او په دې لړ کې په ښۍ سترګه ړوند شوی هم دی.
