د امریکا متحده ایالاتو د بهرنیو چارو وزیر جان کری د ایټالیا په هېواد کې اعلان وکړ، چې افغانستان ته د داعش پرضد ایتلاف کې غړیتوب ور کول شوی دی.
د چارو شنونکي په دې باوردي، چی د داعش وسله والې ډلې د ځپلو له پاره جوړ شوي ایتلاف کې د افغانستان ورګډول ګټور ګام دی.
د سیاسي چارو شنونکي رحمت الله بېژن پور په دې اړه سلام وطندار سره په مرکه کې وویل، افغانستان هغه هېواد دی، چې د ترهګریزو ډلو له لوري یې ډېرې ستونزې ګاللي دي.
دی زیاتوي، چې افغانستان باید د نړۍ په کچه هغو ایتلافونو کې چې د ترهګرو د ځپلو له پاره دې ورګډ شي او امنیتي ځواکونه یې په تجهیزاتو سمبال شي، نو د ترهګرۍ سره په مبارزه کې اغیزمن رول درلودلی شي.
د چارو بل شنونکی ایوب شهریار سلام وطندار سره په مرکه کې وویل، چې شاوخوا له یو کال راهیسې د افغانستان دختیځ زون په ځېنو ولسوالیو او د هېواد په یو شمېر نورو ولایتونو کې د داعش ډلې موجودیت لیدل شوی دی.
دی وايي، چې دغه ایتلاف کې د افغانستان ورګډول ګټور کار دی او افغانستان د داعش وسله والې ډلې د پلانونو په شنډولو کې اغیزمن دی.
شهریار وویل، چې افغانستان کولی شي له دې فرصت نه ګټه واخلي او د داعش ډلې په اړه لازم اطلاعات تر لاسه کړي.
خو له بل لوري د نظامي چارو شنونکی کابل خان تدبیر بیا وايي، چې د داعش پر وړاندې په نړیوال ایتلاف کې د افغانستان یوځای کېدل ځېنې زیانونه هم لري.
تدبیر د زیانونو په اړه وايي، چې افغانستان یو جګړه ځپلی هېواد دی او دغه ډون به په افغانستان کې د داعش ډلې بریدونه او فعالیتونه زور واخلي.
نوموړی زیاتوي، د دې پرځای باید نړیوالو هغه ځایونه په نښه کړي وی، چې چېرې د داعش ډلې روزنیز مرکزونه دي او نورو هېوادونو ته ورلېږل کېږي.
کابل خان تدبیر وايي، چې نړیوال ځواکونه باید د دې ترهګرۍ سره د مبارزې له پاره افغان امنیتي ځواکونه ښه تجهیز او پیاوړي کړي.
افغانستان په داسې حال کې د داعش پرضد د نړیوال ایتلاف غړی کېږي، چې ولسمشر غني په وار وار سره ویلي و، چې افغانستان په د داعش او نور ترهګریزو ډلو ګور وګرځوي.
په دې وروستیو کې د افغانستان ملي دفاع وزارت چورلکو په ننګرهار کې د داعش وسله واله ډله ځپلې ده.
