د سره صليب سیمه ییز مسؤلين وايي، چې له تېرو شپږو کلونو راهيسې يې هلمند کې د جګړې شاوخوا ۶ زره قربانيانو ته د بدن مصنوعي غړي جوړ کړي دي او له ډېر نورو سره یې مرسته کړې ده.
دوی وايي، چې له یو کال راهیسې یې ۳۶۰۰ کسانو سره د بدن د مصنوعي غړو په جوړولو کې مرسته کړې ده او زیاتوي، چې له ۴ کلونو راهیسې یې د جګړې له قربانیانو سره دغې مرستې ته دوام ورکړی دی.
هلمند کې د سره صليب د څانګې مشر احمد هلک د (جولای په ۴مه) د یوې غونډې په ترڅ کې وویل، چې سږکال په دې ولایت کې جګړه زیاته شوې ده او ډېر ولسي وګړي د جګړې قربانیان شوي دي.
په دغه غونډه کې قومي مشرانو، دیني عالمانو او مدني فعالانو ګډون کړی و.
د دې ولایت د سره صلیب د مشر په وینا سږ کال یې په هملند ولایت کې د جګړې ۳۶۰۰ قربانیانو ته مصنوعي غړي جوړ کړي دي.
نوموړي زیاته کړه، چې په دې ولایت کې به ډېر ژر د اورتوپیدي مرکز پرانیستل شي.
ده همداراز وویل، چې په یاد مرکز کې به له موږ سره معلولین کار کوي له یوې خوا به د دوی د کاري بوختیا او له بل لوري به د معلولو کسانو له زړه نه ښه خبر وي.
دغې ځايي ادارې له خلکو سره د بدن مصنوعي غړو له مرستې سربېره د کرنې، مالدارې او خوراکي توکو مرسته هم کړې ده.
د هلمند مرستيال والي محمد جان رسوليار د سره صلیب فعالیتونه اغیزمن وبلل او زیاته یې کړه، چې ولایتي ادارې سره صلیب ته ځمکه ورکړې ده تر څو یو اورتوپیدي مرکز جوړ کړي.
په ورته وخت کې د هلمند ولایت د مدني ټولني مشر سردار محمد همدرد او دولایتي شورامنشي حیات الله مایار هم د یادې ادارې کارونه وستایل او زیاته کړه، چې د جګړې د قربانیاتو د شمېر زیاتېدل د اندېښنې وړ دي.
دوی ټینګار درلود، چې هرو مرو دې د جکړې مخه ونیول شي، چې د قربانیانو په شمېر کې کموالی راشي.
په هلمند ولایت کې د سره صلیب له خوا دغه ناسته په داسې حال کې تر سره کیږي، چې تېر کال په وروستیو میاشتو او د روان کال په لومړیو کې هلمند د سخت جنګ شاهد و.
دغه جنګ په زرګونه تنه د خپل بدن له غړو بې برخې کړل.
