قطر کې د طالبانو د سیاسي دفتر ویاند سهیل شاهین پر خپله ټوېټرپاڼه ليکلي چې نن د افغان حکومت ۲۰ بندیان د طالبانو له زندانه خوشې کېږي.
شاهین ویلي چې دغه خوشې کېدونکي بنديان به کندهار ولایت کې د سره صلیب ادارې ته وسپارل شي.
د طالبانو له زندانونو د افغان دولت زندانیان وروسته له هغې خوشې کېږي چې افغان دولت تراوسه د دغې ډلې ۳۰۰ بندیان له بګرام زندانه خوشې کړي دي.
د ملي امنیت شورا د چهارشنبې په ورځ ماښام د (حمل میاشتې په شلمه) یوه اعلامیه کې وویل، د طالبانو ۱۰۰ بنديان د هغوی روغتیايي وضعیت، عمر او د بند پاتې مودې ته په پام، له دغه زندانه خوشې شوي دي.
ولسمشر محمد اشرف غني د لوړې مراسمو کې د ۵ زره طالب بندیانو خوشې کولو امر وکړ او ويې ویل، دغه بنديان د سولې د هڅو یوې برخې په توګه په تدریجي ډول د افغانستان له زندانونو خوشې کېږي.
د یوه خوشې شوي زنداني په خبره، ازاد شوي بندیان د پروان، پکتیا، پکتیکا، بغلان، هلمند، کندهار او ځینونو نورو ولایتونو دي.
د ملي امنیت شورا دفتر نن سهار د (حمل میاشتې په ۲۴مه) وویل چې د ولسمشر غني د حکم پر بنسټ تېره ورځ د طالب بندیانو درېیمه ډله د هغوی روغتیايي وضعیت، عمر او د هغوی د بند پاتې مودې ته په پام، د سولې د هڅو او د کرونا ويروس د خپريدو مخنيوي په موخه له بنده خوشې شوي دي.
