افغانستانده تینچلیک تأمین‌لنیشی خصوصیده، افغانستانلیک‌لر ارا تینچلیک ییغینی کیله‌جک هفته چین نینگ میزبانلیگی بیلن مذکور مملکت‌ده یولگه قوییلیشی خصوصیده قرار قیلینگن.
قطرده طالبان گروهی نینگ سیاسی دفتری سوزلاوچیسی سهیل شاهین نینگ سلام‌وطندارگه ایتیشیچه، افغانستان و پاکستان بوییچه چین نینگ خاص نماینده‌سی و قطر بوییچه چین نینگ ایلچیسی دینگ شیجون، اوتگن کون (سه‌شنبه، 30- میزان) قطرده طالبان گروهی نینگ سیاسی دفتری نی باشلیغی ملا برادر بیلن اوچره‌شگن.
اونگه کوره، بو اوچره‌شووده شیجون طالبان گروهی نینگ هیأتی‌نی چین ده یولگه قوییلیشی کوتیلگن افغانستانلیک‌لر ارا ییغین گه چقیرگن.
شاهین نینگ ایتیشیچه، چین ییغینی «افغانستانده قنده‌ی بیر شکلده تینچلیک تأمین‌لنه‌دی» نامی‌ده کیله‌جک هفته 7- عقرب سه‌شنبه و 8- عقرب چهارشنبه کونلری چین ده یولگه قوییله‌دی و بو ییغین اشتراکچی‌لری اوزلریدن نماینده‌لیک قیله‌دی و افغانستان توغریسیده فکرلرینی بیلدیره‌دی.
جناب شاهین نینگ ایتیشیچه، چین ییغینده طالبان هیأتی بیلن افغانستان سیاستچی‌لری تینچلیک سوزلشوولری قنده‌ی بولیشی توغریسیده ایکی کون بحث قیلیشه‌دی و ییغین اداغیده قوشمه اعلامیه صادر ایتیله‌دی.
قطرده طالبان گروهی نینگ سیاسی دفتری سوزلاوچیسی نینگ کوپه‌یتیریشیچه، بو اوچره‌شووده شیجون بیلن ملابرادر «تینچلیک و قطرده آمریکا و طالبان نماینده‌لری آره‌سیده تیارلنگن حجت و بو حجت‌دن آمریکا چیکیلگنی» کبی موضوعلر توغریسیده بحث قیلیشگن.
حکومت تشکیلاتیدن بولگن بیر منبع یقین آره‌ده افغانستانلیک‌لر ارا ییغین یولگه قوییلیشی نی تصدیقلگن، بیراق رسمی شکلده بو توغریده هیچ نرسه دیمه‌گن.
گزارشلر اساسیده، حکومت و باشقه سیاسی جریانلردن تشکیل ایتیله‌دیگن 25 اعضالیک بیر هیأت چین ده یولگه قوییله‌دیگن افغانستانلیک‌لر ارا ییغینده اشتراک قیلیشی خصوصیده قرار قیلینگن.
چین ییغینی افغانستانلیک‌لر ارا تورتینچی تینچلیک ییغین بولیشی ممکن. بوندن آلدین افغانستانلیک‌لر ارا بیر تینچلیک ییغینی قطر باشکینتی دوحه‌ده و ایکی ییغین روسیه باشکینتی مسکوده یولگه قوییلگن ایدی.
عین حالده، افغانستان تینچلیک لایحه‌سی بوییچه آمریکانی خاص نماینده‌سی زلمی خلیلزاد، تینچلیک سوزلشوولری خصوصیده، اوتگن دوشنبه دن بویان ینگی سفرلرینی باشله‌گن.
شونینگدیک، افغانستان حکومتی نینگ ایتیشیچه، تینچلیک‌که تیگیشلی سعی و حرکت‌لر قیته‌دن باشلنگن.
آمریکا و طالبان گروهی نینگ نماینده‌لری آره‌سیده افغانستان تینچلیگی خصوصیده بولگن سوزلشوولر 9- دور دن سونگ، 17- سنبله‌ده کابل شهریده طالبان گروهی تامانیدن اویوشتیریلگن هجوم ده بیر امریکالیک حربی شامل 12 کیشی هلاک ایتیلگنی باعث، آمریکا جمهور رئیسی دونالد ترامپ تامانیدن بیکار قیلیندی.
شو توغریده…
ایش بیلرمانلر: تینچلیک سوزلشوولری باشله‌نیشی اوزگریش‌لر بیلن بیرگه بولیشی ممکن
