د افغانستان فوټبال فدراسیون له خوا د ۱۴ کلنو تنکیو ځوانانو ترمنځ د افغانستان په کچه د زونونو ترمنځ لومړي پړاو فوټبال غوره لیګ سیالۍ د مرکز زون (شاهین اسمایي) لوبډلې وګټلې.
په خپره شوې خبرپاڼه کې راغلي، چې یادې لوبډلې په (فاینل) لوبه کې خپله سیاله د طوفان هریرود لوبډله په پنلټي شوټونو کې په ګونډو کړه.
دغه سیالۍ د کابل په (ګول) پروژې فوټبال لوبغالي کې ترسره شوه، چې د ټاکلو قانوني او اضافه وختونو سره سره بیا هم بغیر له کوم ګول څخه په مساوي توګه پای ته ورسیده.
د ټورنامنټ د پایلې او اتلې لوبډلې د معلومولو له پاره پریکړه (پنلټي) شوټونو ته ووتله، چې په کې د یوې په زړه پورې لوبې وروسته شاهین اسمایي لوبډلې ۴ د ۲ ګولونو په وړاندې اخر هم خپله سیاله لوبډلې ماتې ته تسلیم کړه.
له دې وړاندې په لومړۍ نیمه پای لوبه کې شاهین اسمایي لوبډلې د پنلټي شوټونو په مټ ۳ د ۱ ګول پر وړاندې سیمرغ البرز لوبډلې ته ماتې ورکړې وه او طوفان هریرود ۳ د ۱ ګول پر وړاندې میوند اتلان لوبډله له مخې لرې کړې وه او پای لوبې ته رسیدلې وې.
دغه راز د سیالیو په پای کې سیمرغ البرز لوبډلې ته د اخلاقو کپ ورکړل شو.
د یادونې وړ ده، چې په دې ټورنامنټ کې د هیواد د ۸ بیلا بیلو زونونو ۱۴ کلنو تنکیو ځوانانو فوټبال لوبډلو (شاهین اسمایي، طوفان هریرود، د سپین غر بازان ، د اباسین څپې، موجهای امو ، د میونداتلان، سیمرغ البرز او عقابان هندوکش) برخه اخیستې وه.
که څه هم د افغانستان فوټبال فدراسیون له خوا له ۲۰۱۲ م ز کال راهیسې د افغانستان د زونونو په کچه د لویانو فوټبال لوبډلو ترمنځ د فوټبال غوره لیګ سیالۍ پیل شوي دي، خو دا لومړې ځل وو، چې د هیواد د زونونو په کچه د ۱۴ کلنو تنکیو ځوانانو ترمنځ د فوټبال غوره لیګ سیالۍ ترسره شوې.
دغه سیالۍ د ټولو ګډون کوونکو لوبډلو د روزونکو او ادارو غړو او دغه راز د افغانستان فوټبال فدراسیون د لوړو پوړو چارواکو په شتون کې د ډالیو په ویشلو سره پای ته ورسیدې.
