افغانستان جمهورلیک ریاست سیلاویدن نظارت قیلووچی اداره‌لرنی مسؤوللری نینگ ایتیشیچه، جمهورلیک ریاست سیلاوی نینگ آق آوازلریدن قاره آوازلرینی اجره‌تیش و آوازلرنی انتقال بیریش آلمانی‌لیک درمالوگ شرکتی نینگ اختیاریده بولگن و اونی مدیریت قیلیش‌ده سیلاو کمیسیونی نینگ هیچ قنده‌ی رولی یوق دیر.
اولرگه کوره، جمهورلیک ریاست سیلاوی نینگ دستلبکی نتیجه‌سینی اعلان قیلیش زمانی توخته‌تیلیشی قبول قیلینمس بولیب و بو ایش سیلاو کمیسیونی‌نینگ کوچسیزلیگی و برنامه سیزلیگی‌نی کورسته‌دی.
بوگون «دوشنبه» کابل‌ده خبری بیر ییغین اوتکزگن سیلاو سلامتی‌دن نظارت قیلووچی اداره اعضاسی مبین‌الله ایماق نینگ ایتیشیچه، آق آوازلردن قاره آوازلرنی اجره‌تیش، عمومی سرورگه آوازلرنی انتقال بیریش و رقم‌لرنی معلوم قیلیش اختیاری درمالوگ شرکتی نینگ قولیده بولگن و سیلاو کمیسیونی بو جریان نی مدیریت قیله آلمه‌یدی.
بیراق، سیلاو ایرکین کمیسیونی نینگ سوزلاوچی‌لریدن بیری عبدالعزیز ابراهیمی نینگ ایتیشیچه، اوشبو جریان نینگ مدیریتی سیلاو ایرکین کمیسیونی نینگ قولیده دیر و درمالوگ شرکتی شامل هیچ بیر اداره بو کمیسیون نینگ ایشلریده اره‌لشه آلمه‌یدی.
عین دمده، بوگون «دوشنبه» وزیرلر کینگشی ییغینیده جمهورلیک ریاست سیلاوی نینگ نامزدلریدن بیری داکتر عبدالله عبدالله، سیلاو جریانیده شفافیت سقله‌نیشی اوستیگه تأکیدلگن.
جناب عبدالله گه کوره، تینچلیک اوچون همه‌شمول بیر توشونچه کیره‌ک و مملکت‌ده تینچلیک تأمین‌لنیشی اوچون بوتون موجود فرصت‌لردن فایده‌لنیش لازم.
افغانستان بوییچه جمهورلیک ریاست سیلاوی 6- میزان ده اوتکزیلدی. اوشبو سیلاونینگ دستلبکی نتیجه‌سی 23- عقرب ده و سونگی نتیجه‌سی 15- قوس ده اعلان ایتیلیشی خصوصیده قرار قیلینگن.
شو توغریده…
جمهورلیک ریاست سیلاوی نینگ سونگی نتیجه‌سی 15- قوس ده اعلام ایتیله‌دی
