میدیالرگه ییتیشگن ینگی حجت‌لرگه کوره، سیلاولر ایرکین کمیسیونی جمهورلیک ریاستی سیلاویده آواز بیرووچی‌لر تانیلیشی اوچون بایومتریک اسکونه‌سیدن ایش آلینمه‌سی خصوصیده قرار قیلگن. سیلاولر کمیسیونی نینگ بو قراری، سیلاولر بوییچه اوزگریلگن قانونی گه قرشی دیر.
سیلاولر بوییچه اوزگریلگن قانون نینگ 19- ماده‌سی و 2- فقره‌سیده کیلیشیچه: «سیلاولر کمیسیونی، سیلاو جریانیده بایومتریک اسکونه‌سیدن فایده‌لنیشی خصوصیده تدبیر آلیشی کیره‌ک.»
سیلاولر جریانیدن نظارت قیلووچی اداره‌لردن بیرقطاری، جمهورلیک ریاستی سیلاویده بایومتریک اسکونه‌سیدن فایده‌لنمه‌سی توغریسیده سیلاولر ایرکین کمیسیونی تامانیدن آلینگن قرارنی قصدی دییدیلر.
سلام‌وطندارگه صحبت بیرگن افغانستان بوییچه ایرکین و عدالت‌لی سیلاو اداره‌سی یا-ده فیفا اجراییه باشلیغی یوسف رشیدنینگ ایتیشیچه، سیلاولر کمیسیونی نینگ قراری سیلاو قانونی گه قرشی دیر و بو قرار خطا یا-ده خبرسیزلیک اساسیده ایمس، بلکیم قصدی شکلده آلینگن.
جناب رشیدگه کوره، سیلاولر کمیسیونی نینگ بو قراری، مملکت نی جدی شکلده قیین‌چیلیک‌که دوچ قیله‌دی.
جناب رشیدنینگ کوپه‌یتیریشیچه، سیلاولر ایرکین کمیسیونی بایومتریک اسکونه‌سیدن فایده‌لنیش گه قادر بولمه‌گن حالده، جمهورلیک ریاستی سیلاوی یولگه قوییلیش زمانی‌نی آرتده قالدیرمه‌سی کیره‌ک ایدی.
فیفا اجراییه باشلیغی نینگ ایتیشیچه، بایومتریک اسکونه‌سیدن ایش آلینمه‌سی و آواز بیرووچی‌لرنی رویخط گه آلیش جریانی باشلنمه‌گنی، سیلاولر ایرکین کمیسیونی نینگ ناکام‌لیگی نی کورسته‌دی.
شونینگدیک، سیلاولر ایرکین کمیسیونی نینگ ینگی قراری توغریسیده نشر قیلینگن حجت، سیاسی حزبلردن بیرقطاری نی عکس‌العملی گه دوچ کیلدی.
سلام‌وطندارگه صحبت بیرگن افغانستان اسلامی جمعیت جزبی نی رهبرلیک اعضاسی نوررحمان اخلاقی نینگ ایتیشیچه، جمهورلیک ریاستی سیلاویده بایومتریک اسکونه‌سیدن فایده‌لنمه‌گن صورتده، ساخته‌کارلیک اوچون زمینه یره‌تیله‌دی.
شونینگدیک، افغانستان ملی اسلامی جنبش حزبی نینگ رهبرلیک اعضاسی، سیلاولر کمیسیونی نینگ بو قرارینی سیلاو قانونی گه قرشی دییدی.
اوشبو موضوع توغریسیده سیلاولر ایرکین کمیسیونی نینگ فکرینی اورگه‌نیش اوچون علاقه قوردیک، بیراق مذکور کمیسیونی سوزلاوچیسی اورین باسری عبدالعزیز ابراهیمی، بو موضوع توغریسیده فکر بیلدیریش دن وازکیچدی.
جمهورلیک ریاستی سیلاوی جاری ییل، 6- میزانده یولگه قوییلیشی خصوصیده قرار قیلینگن.
