بوگون «شنبه» 28- میزان نمایندهلر کینگشینینگ سیلاوی یولگه قوییلدی و قوراللی طالبلر بو جریاننی برهم اوروش اوچون بوگون ایرتهلب قندوز شهری و تومنلرینی راکت آرقهلی هجوم آستیگه آلگن.
قندوز شهری اوستیگه طالبلر تامانیدن هجوم اویوشتیریلگنینی تصدیقلگن مذکور ولایت پولیس قومندانلیگینی خوفسیزلیک آمری صفیالله محزوننینگ ایتیشیچه، امنیتی کوچلر اولرنینگ هجومینی مدافعه قیلماقده.
باشقه تاماندن عینی گواهلرنینگ ایتیشیچه، ولایت بناسی یقینیده بیر آواز بیریش مرکز اوستیگه ایکی هوان توشگن و کیمسه گه زیان ییتمهگن.
محزوننینگ کوپهیتیریشیچه، شونینگدیک بوگون ایرتهلب قوراللی طالبلر قندوز ولایتینینگ امامصاحب تومنی اوستیگه هجوم قیلگن؛ بیراق امنیتی کوچلر بو هجومنی دفع قیلگن.
او، اهالیدن امنیتی مسئلهلردن خواطرلنمهی آواز بیریش مرکزلریگه باریب و آواز بیریشلرینی سورهگن و امنیتی کوچلر توانی باریچه عصیانچیلرگه قرشی کورهشهدیلر.
عین حالده، قندوز ولایتیده سیلاولر ایرکین کمیسیونینینگ ولایتی دفتری باشلیغی محمدرسول عمرنینگ ایتیشیچه، مذکور ولایتنینگ 9 تومنیدن 3 تهسی جملهدن قلعهزال، کلباد و گلتپه تومنلریده آواز بیریش مرکزلری یاپیلگن و چهاردره تومنیده یالغیز بیر آواز بیریش مرکز فعال دیر.
