د اريانا هوايي چلند شرکت چارواکي ډاډ ورکوي، چې سږکال به د حج زیارت کوونکو د لېږد چارې له ځنډ سره مخ نه شي.
د دغه شرکت مرستیال محمد عمر زیاته کړه، دغه دولتي شرکت سره دې مرسته وشي، څو په راتلونکي څو کلونو کې په خپلو پښو ودريږي.
همدارنګه نوموړی، چې د ولسي جرګې نننۍ عمومي غونډې ته رابلل شوی زياته کړه، تېره شپه د اریانا هوايي شرکت رییس د چارتر طیارو د تړون لاسلیک کولو لپاره ترکیې ته تللی دی.
د ولسي جرګې نننۍ عمومي غونډې ته دوه نور وزیران هم راغوښتل شوي وو.
د ولسي جرګې استازو وویل، چې نږدې یوه میاشت وروسته د حاجیانو د لېږد چارې پېل کيږي، خو تر اوسه پورې د دغه شرکت له خوا د حاجیانو د لېږد له پاره الوتکې نه دي اجاره شوي.
په ورته وخت کې د ترانسپورت اوهوایي چلند وزیرمحمد الله بتاش د ولسي جرګې استازو ته وویل، که د اریانا افغان هوايي شرکت ريیس نن دغه تړون لاسلیک کړي، نو د حاجیانو په لېږد کې به کومه ستونزه رامنځته نه شي.
د ولسي جرګې لومړي مرستیال عبدالظاهر قدیر وویل، چې د حج چاره باید کمېسیون ته نه، بلکې اړوند وزارتونو په غاړه اخیستې وی.
د حج او اوقافو وزیرفېض محمد عثماني وویل، چې د حج له پا ره ټول چمتووالی نیول شوی دی او ښایي د اسد په ۲۸ نېټه د حج زیارت کوونکو د لیږد لړۍ پیل شي او له څلورو هوایي ډګرونو به الوتنې کیږي.
فېض محمد عثماني زیاته کړه، چې که د ترانسپورت په برخه کې څه ستونزه رامنځته شي، نو دوی یې پروړاندې مسولیت نه لري.
په افغانستان کې د حج پروسه هرکال له یو لړستونزو سره مخ وي، خود پخوا په پرتله سږ کال دغه پروسه ښه شوې ده.
د یادونې وړ ده، چې سږ کال د تېر کال په پرتله د حج په لګښت کې شاوخوا ۱۰ میلونه ډالره کموالی راغلی او حاجيانو ته اسانتیاوې هم زیاتې شوي دي.
د ارګ څخه را رسيدلي راپورونه وايي، چې هر حاجي ته په تګ راتګ کې شاوخوا ۳۰۰ ډالره ګټه رسېدلې ده.
