د جوزجان د ولایتي شورا یوه غړې او یو شمېر ځایي خلک وايي، د دې ولایت په قوشتپې او درزاب ولسوالیو کې ځینې دیني مدرسې ماشومان ترهګریزو فعالیتونو او د دولت خلاف جګړې ته لمسوي.
په همدې حال کې د قوشتپې او درزاب ولسوالیو یو شمېر اوسېدونکي چې ماشومان يي د ناامنیو په سبب له ښوونځي محروم شوي سلام وطندار ته وویل، خپل اولادونه د دیني زده کړو له پاره مدرسو ته لېږي، خو د دې مدرسو ښوونکي ماشومان د دولت پر ضد لمسوي.
د دوی په خبره پاکستاني ملایان ورته په دیني مدرسو کې د ماین خښولو او نورو ترهګریزو فعالیتونو زده کړې ورکوي.
د جوزجان د ولایتي شورا غړې حلیمې صدف کریمي سلام وطندارته وویل، قوشتپه او درزاب ولسوالیو کې د انجونو له پاره ښوونځیو ته د ورتګ اجازه نشته ده.
نوموړې خبرداری ورکړ، که په دغو ولایتونو چاڼیز عملیات ونه شي ښايي ټول ښوونځي بند او دیني مدرسې ماشومان د دولت پرضد ولمسوي.
په ورته وخت کې د جوزجان د والي ویاند محمد رضا غفوري وايي، د سیمې په ځانګړې توګه د پاکستان استخبارات هڅه کوي دغه ولسوالیانې ناامنه کړي، خو امنیتي ځواکونه به هېچا ته اجازه ورنه کړي، ترڅو ماشومان سخت دریځۍ او بنسټ پالنې ته وهڅوي.
د غفوري پر وینا امنیتي ځواکونه به ډېر ژر په دې ولسوالیو کې چاڼیز عملیات پيل کړي او د سیمې خلکو اندېښنې به حل کړي.
قوشتپه او درزاب د جوزجان له مهمو ولسوالیو دي. له فاریاب او سرپل ولایتونو سره ګډه پوله لري؛ چې په تېرو څو میاشتو کې زیاتې ناامنه شوي دي.
