د سویډن هېواد د کورنیو چارو وزیر انډرس یګمن ویلي دي، هغه پناغوښتونکي به له هېواد وباسي، چې غوښتن پاڼې یې د دغه هېواد له لوري رد شوي دي.
نوموړي ویلي دي، چې د پناغوښتونکو دغه شمېر له ۶۰ تر ۸۰ زرو پورې دی.
تلګراف ورځ پاڼې د سویډن هېواد دغه لوړپوړي حکومتي چارواکي له قوله لیکلي دي، چې دغه شمېر پناغوښتونکي به د څو کالونو په جریان کې له هېواد بېر ته خپلو هېوادونو ته د سوداګریزو الوتکو په وسیله ولېږدوي.
سویډن په تېر زېږدیز کال کې ۱۶۰ زرو پناغوښتونکي قبول کړي دي.
سویډن د اروپايي ټولنې په ډله کې یواځېنی هېواد دی، چې د ۹،۸ میلیونو نفوس په درلودولو سره تر نور اروپايي هېوادونو زیات پناغوښتونکي یې قبول کړي دي.
د پناغوښتونکو په پنډغالي کې د یوې مرسته کوونکي ځوانۍ مېرمنې وژل کېدل د دې لامل شو، چې د پناغوښتونکو په اړه بدبیني زیاته شي.
دغه مېرمن الکساندره مظهر نومېده، چې د یو ۱۵کلن سومالیايي ځوان له لوري د چړې په وسیله ووژل شوه.
دغه پېښه د دې لامل شوه، چې د دې پنډغالي زرګونه ځوانان بې برخلیکه پاتې شي.
جګړې او ناامنۍ د پناغوښتونکي د بحران لاملونه دي.
د ۲۰۱۵ زېږدیز کال له سوریې، افغانستان او عراق څخه سلګونه زره خلک اروپا ته تللي دي.
د اروپايي هېوادونو د مشرانو له جدي هڅو سره سره بیا هم د خلکو یو لویه کتله اروپايي هېوادونو ته روان دي.
د ملګرو ملتونو سازمان نوې شمېرې ښيي، چې په یوې میاشت کې ۴۶ زره پناغوښتونکي د یونان له اوبو تېر شوي او ۱۷۰ تنه یې د لارې په اوږدو کې وژل شوي دي.
