د طالبانو د رژيم پر مهال په پاکستان کې د دغې ډلې سفیر ملا عبدالسلام ضعیف، چې د "هرات په امنیتي خبرو اترو" غونډه کې برخه درلوده وویل، چې د افغانستان د جنګ او سولې برنامه تحمیلي ده.
نوموړي د هرات په ۵ امنیتي ناسته کې زیاته کړه، چې د افغانستان د ستونزو د حل لاره جنګ نه ده او باید یو بین الافغاني سولې ته غاړه کېښودل شي.
ملا عبدالسلام ضعیف دا هم وویل، چې نه باید دغه برنامې او تصمیمونه تحميلي بڼې ولري.
د طالبانو د رژيم پر مهال په پاکستان کې د افغانستان سفیر وايي، د افغانستان د جنګ له پاره کوم ستراتيژي، چې په پام کې نیول شوی مثبته پایله نه شي لرلی.
هغه همدارنګه له وسله والو طالبانو سره د سولې په هکله ۴ اړخیزه ناسته هم تحمیلي وبلله.
هغه له حکمتیار سره د سولې په اړه وویل، له حکمتیار سره د حکومت او نړېوالې ټولنې پر ژمنو عمل به پر طالبانو هم مثبت اغیز وکړي.
د طالبانو د دغه پخواني غړي پر خبره، حکومت او نړېوالې ټولنې له حزب اسلامي مشر ګلبدین حکمتیار سره زیاتې ژمنې کړي او باید د دغو ژمنو د عملي کولو له پاره انتظار وشي، چې د حکمتیار پر وړاندې څه عکس العمل ښي.
له بل لوري د پخواني ولسمشر حامدکرزي د حکومت پرمهال د ملي امنیت سلاکار ډاکټر رنګین سپنتا وايي، تر هغه چې له تروریزم سره د مبارزې په برخه کې د نړېوالو ستراتيژي او جغرافیه بدله نه شي افغانستان سولې او ټيکاو ته نه شي رسيدلی.
هغه د پاکستان په اړه وویل، چې د تروریزم تولیدونکی هېواد دی او تر اوسه په دغه هېواد کې د سولې او مذاکرې ذهنیت نه دی رامنځ ته شوې.
هغه خبرداری ورکړ، تر څو چې په پاکستان کې د تروریزم د تولیدولو ځایونه له منځه یو نه وړل شي، نو افغانستان به د سولې خاوند نه شي.
