د کانونو او پترولیم وزارت چارواکي وايي چې د هېواد ځمکنۍ شتمنۍ دې خوندي شي.
ددغه وزارت چارواکي ویره ښکاره کوي، هسې نه دافغانستان معادن د وسله والو ډلو لاس ته وغورځي.
د یاد وزارت وزیر داود شاه سبا نن د (جون په ۱۰مه) په و لسي جرګه کې وویل، چې دوی د ځېنو کاونونو او د ګازو نل لېکو امنیت له پاره امنیتي پلان جوړوي.
داود شاه سبا زیاته کړه، چې د شبرغان او مزار شریف پر لاره به د ګازو نل لیکې دخوندیتوب له پاره ۶ امنیتي پوستې، د مس عینک د کان د خوندیتوب له پاره ۲۰ او له شبرغان نه تر سرپل پورې ۹ امنیتي پوستې جوړوي.
داود شاه سبا دغه خبرې د ۱۰۰ ورځني کاري پلان د وړاندې کولو پر مهال وکړې.
سبا وویل اوس له دغو سرچینو نه طالبان ګټه اخلي؛ نو حکومت ته په کار ده چې پرېنږدي وسله والې ډلې ترې تغذیه شي.
د کانونو وزیر وویل، په راتلونکو ۱۰۰ ورځو کې به دوی د حکومتوالۍ، جیولوژیکي سروې ګانو، د نفتو او ګازو د سرچینو کشفولو، د کان کېندنې مدیریت، د کانونو په قانون کې د تعدیل، د کان کېندنې د تخنیکي ظرفیت لوړونې او ځېنو نورو برخو باندې پاملرنه زیاته کړي.
نوموړي وویل چې په نږدې راتلونکې کې پر لویو کانونو کار کول ناشونی دي، ده زیاته ی کړه، چې د دوی پلان اوس يوازی پر وړو کانونو ورټول دی.
ده همدا راز ژمنه وکړه چې په راتلونکو سلو ورځو کې به د کاني زیر مو په اړه خلکو ته معلومات ورکړي.
په دې کاري پلان کې د ټاپي پروژې پيلېدل، د کانونو عوایدو له پاره طرحه جوړول، په کان کېندنه کې د ماشومانو د ګومارنې مخنیوي څارنه هم شمارل شوي دي.
له دې مخکې د کانونو او پترولیم وزیر خبرداری ورکړی و چې د هېواد کاونونو ته دې جدي پاملرنه وشي.
سبا ویلي وو، که دولت په دې اړه بې غوري وکړي هېواد به د ستر معدني کړ کېچ سره مخ شي.
.
