د تخار د دشتقلعه ولسوالۍ کې د جګړې له امله ۴ بېځایه شویو کورنیو د تالقانو ښار یوه څنډه کې د پرلت خېمه وهلې.
دغه کورنۍ د ژمي سړې او د واورو شپې تر خېمو لاندې تېروي.
دا بېځایه شوې کورنۍ وايي، له څوو میاشتو راهیسې یې حکومتي مسوولینو پوښتنه نهده کړې.
بېځایه شوی قاري نعیم وايي، د امکاناتو نهشتوالی او د ژمي سړې هوا په دلیل یې د ماشومانو ژوند له ګواښ سره مخ دی.
دی زیاتوي، د ماشومانو د درملنې لهپاره د پيسو نهشتوالی لا څه چې له درېیوو شپو راهیسې خواړه هم نهلري.
دغه بېځایه شوي د دشتقلعه ولسوالۍ د النګ سیمې اوسېدونکي دي او وايي، کلی یې طالبانو نیولی دی او د هغوی له وېرې خپلو کورونو ته نهشي ستنېدلی.
دوی له حکومته د مرستې د غوښتنې ترڅنګ شکایت کوي چې په تېر کې هم مرستې نهدي ورسېدلي.
هاخوا د تخار ولایتي شورا منشي محمداعظم افضلي ـ چې نن سهار یې د دغو کورنیو انځورونه فېسبوکي کړيوو ـ وویل چې بېځایه شوي د تالقانو ښار مختلفو سیمو کې کرایي کورونو او خیمو لاندې ژوند کوي چې مرستو ته اړتیا لري.
خو د تخار والي ویاند جواد هجري وویل، حکومت د جګړې د بېځایه شویو وګړیو سروې کړې چې د ځايي ادارې او مرستندویو بنسټونو له لوري د مرستو وېشلو لړۍ دوام لري.
د هغه په وینا، تېره اوونۍ یې د څه باندې ۵.۲ میلیونو افغانیو په ارزښت ۴۷۰ بېځایه شویو کورنیو سره د خوراکي توکیو او نغدو پيسو مرسته کړېده.
د تخار د طبیعي پېښو د مخنیوي اداره هم وايي چې دغو کورنیو سره مرستې شوېدي؛ خو هغوی نه غواړي خپلو سیمو ته ستانه شي.
زیاتره بېځایه شوي د کندوز د دشتارچي ولسوالۍ او د تخار د خواجهغار، دشتقلعه، بنګي او بهارک ولسوالیو څخه دي چې د تخار مرکز ته یې پناه وړې ده.
د ځايي چارواکیو په وینا، دغه ولایت کې تراوسه پورې ۲ زره کورنۍ تثبیت شوېدي.
