سیلاو شکایتلرینی تینگلش کمیسیونی مسووللری، جمهورلیک ریاستی نامزدلریدن سیلاو نتیجهسی خصوصیده وقتدن آلدین فکر بیلدیرمهیشلرینی سورهگنلر.
اولرنینگ ایتیشیچه، سیلاو ایرکین کمیسیونی دستلبکی نتیجهنی اعلان قیلگن و نهایی نتیجه شکایتلر تیکشیریلگنیدن سونگ، اعلان ایتیلهدی.
بوگون "یکشنبه" سیلاو شکایتلرینی تینگلش کمیسیونی باشلیغی زهره بیان شینواری نینگ کابلده بیر خبری ییغینده ایتیشیچه، جمهورلیک ریاستی نامزدلرینینگ شکایتلرینی ثبت قیلیش اوچون 3 کون وقتلری بار.
خانم شینواری نینگ کوپهیتیریشیچه، سیلاو شکایتلرینی تینگلش کمیسیونی 15 کون جریانیده سیلاو شکایتلرینی تیکشیرهدی. اونینگ ایتیشیچه، نامزدلر شکایتلری تیکشیریلیشی خصوصیده قناعت قولگه کیرتمهگن صورتده، استیناف طلبلیک قیله آلهدی.
سیلاو شکایتلرینی تینگلش کمیسیونی مسووللری، جمهورلیک ریاستی نامزدلریدن قانونگه کوره، شکایتلر تیکشیریلیشی اوچون سیلاو شکایتلرینی تینگلش کمیسیونیگه رخصت بیریشلرینی ایستهگنلر.
افغانستان بوییچه شفاف سیلاو بنیادی یا-ده تیفا، بیرخبرنامه آرقهلی جمهورلیک ریاستی سیلاوی نینگ دستلبکی نتیجهسی اعلان ایتیلگنینی خوش قرشیلب و مذکور نتیجهگه اوزگرشلیک کیلیشی ممکنلیگینی ایتگن.
خبرنامهده کوپهیتیریلیشیچه، سیلاو ایرکین کمیسیونی 300 مینگ جنجلی آواز خصوصیده دقت قیلمهگن و بوتوغریده سیلاودن نظارت قیلووچی نهادلرگه گزارش بیرمهگن.
تیفا تشکیلاتی، سیلاو ایرکین کمیسیونیدن سیلاو نهایی نتیجهسیده، 300 مینگ جنجلی آواز خصوصیده نامزدلرنی قناعت بیریشینی سورهگن.
