زابل ولایتی‌نینگ خوف‌سیزلیک رسمیلری، اوچ کوندن بیری ولایت‌نینگ ارغنداب، خاک افغان و دای‌چوپان ولسوال‌لیکلریده طالب‌لر بیلن داعش اورته‌سیده اوروش جریانی بارلیگینی ایتگن‌لر.
ولایت‌نینگ پولیس قوماندانی غلام جیلانی فراهی‌نینگ ایتیشیچه، استخباراتی گزارشلرده بوگون ایرتلب‌دن هنوزگچه 50 کیشی داعش و 14 نفر طالب‌لر اعضاسی‌دن هلاک قید ایتیلگن دیگن. او، یره‌لنگن‌لر باره‌سیده بیرار نرسه دیمه‌گن.
مملکت جنوب حوزه‌سی‌نینگ انسان حق حقوقلری کمیسیون مطبوعات مسوولی عبدالعزیز اکرمی‌نینگ سوزلریگه کوره، بونده‌ی اوروش‌لرده کوپینچه تینچ اهالی‌گه تلفات ییته‌دی. جناب اکرمی اوروش تامانلریدن تینچ اهالی مالی و جانی‌گه زیان ییتکیزمس‌لیک‌لرینی سوره‌گن.
شونینگ‌دیک زابل ولایت کینگشی‌نینگ اعضاسی فوزیه کاکرنینگ بیلدیریشیچه، هنوزگچه هم توقنشوو جریانیده تینچ اهالی‌گه ییتگن تلفات توغریسیده انیق معلومات قولده ایمس. او، محلی رسمیلر همده اوروش تامانلریدن اوروش جریانیده تینچ اهالی‌گه زیان ییتکیزمس‌لیکلری باره‌سیده تاکیدله‌گن.
زابل ولایتی‌نینگ خاک افغان، ارغنداب و دای‌چوپان ولسوال‌لیگی‌نینگ ایریم منطقه‌لری سکیزییلدن بیری قورال‌لی طالب‌لر نظارتی‌ده بولگن. عین حالده، بیرینچی مرته ایکی گروه یعنی طالب‌لر و داعش اورته‌سیده بو منطقه‌ده اوروش یوز بیرماقده. اوتگن کون ترقه تیلگن خبرلرده مذکور ولسوال‌لیکلرده ملادادالله منصور و ملااختر محمد منصور جنگریلری اورته‌سیده توقنشو یوز بیرگن‌لیگی ایتیلگن ایدی.
داعش ییتی نفر باشی‌نی کیسدی
غزنی ولایتی ولایت کینگشی‌نینگ رییسی خالق‌داد اکبری‌نینگ سلام‌وطندارگه ایتیشیچه، بوندن بیر ییل آلدین زابل و غزنی یولی‌ده داعش گروهی تامانیدن اوغیرلنگن 17 کیشی‌دن 7 نفری بوگون مذکور گروه بیلن طالب‌لر اورته‌سیده اوروش یوز بیرگن‌دن سونگ باش‌لری کیسیلگن.
مذکور اون ییتی نفر ایچی‌دن قاچیش‌گه موفق بولگن خانم حاضر طالب‌لر نظارتی‌ده سقلنه‌دی، اوشبو خانم جلال آّباد یشاووچی‌سی بولگن لیگی‌نی ایتگن.
اکبری‌گه کوره، اوغیرلنگن 3 عیال قوشیمچه 10 کیشی تقدیری باره‌سیده هنوزگچه انیق معلومات قولده ایمس دیگن.
عین حالده، جاغوری ولسوالی ظفر شریف‌گه کوره، جاغوری قوم بویوک‌لری عمومی یول‌ده هنوزهم اوروش جریانی بارلیگی سبب جسدلرنی محل‌گه آلیب کیلیش‌گه موفق بولمه گنلر.
طالب‌لر هنوزگچه بو باره هیچ نرسه دیمه‌گن.
