د ملي امنيت عمومي ریاست وايي، چې وروسته له څه موده بند سیدالله مشهور په رییس خدای داد، چې په افغانستان کې تر ټولو خطرناک مجرم و اعدام شو.
د ملي امنيت اداره په يوه راليږلې خبرپاڼه کې ويلي،" سید الله مشهور په خدای داد د شنبې په ورځ په ۱۱ بجو او ۳۰ دقیقو د څرخي پله په زندان کې په دار وځړول شو".
سیدالله د حاجي عبدالله زوی دی، چې په ۱۳۵۱ کال د خوست ولایت تڼیو ولسوالۍ کې زیږېدلی و.
د امنيتي ځواکونو له لوري د خدای داد له نيول کېدو وروسته د ملي امنيت ویاند حسیب الله صديقي د يوې خبرې ناستې پر مهال، نوموړی د غلو د ډيرې خطرناکې ډلې مشر معریفي کړ.
د خدای داد لومړنۍ محکمه په تېره جنوري میاشت کې د ده د څلورو ملګرو سره یوځای په کابل کې وشوه.
محکمې هغه مهال حکم وکړ، چې رییس خدای داد په اعدام او د نوموړي سره یو همکار په ۲۰ کاله او ۳ نور ملګري يې په اووه اووه کاله بند محکوم شوي و.
چارواکو د ده له نيولو وروسته ويلي و، چې نوموړی د افغانستان په مختلفو ولایتونو کې په بېلابېلو نومونو تګ راتګ درلود او همدارنګه په جعلي پاسپورټ یې ځینو هېوادونو ته سفرونه کړي و.
د ملي امنيت له لوري په خپاره شوي اسنادو کې دا هم راغلي و، چې د غلو مشر سیدالله پاکستان، تاجکستان او متحده عربي اماراتو ته تګ راتګ کوه او د تاجکستان د پولیسو په تور لست او د نړېوالو پولیسو د لویو مجرمینو په لست کې یې نوم ثبت و.
د کورنيو چارو وزارت چارواکي ويل، چې د دغه خطرناکې ډلې مشر پسې افغان امنيتي ځواکونو د تېرو لسو کلونو راهیسې پلټنې کولې.
د رییس خدای داد مرستیال حبیب استالف د تېر اکتوبر میاشت په اتمه نېټه د پغمان ډله ییز جنسي تيري د پنځو کسانو سره يوځای په دار و ځړول شو.
رییس خدای داد څلور زامن او دوه لوڼې لري، چې د راپورونو پر بڼسټ کورنۍ يې د پېښور په افغان کالوني سیمې کې ژوند کوي .
راپورونه په ډاګه کوي، چې ریس خدایداد دکابل خیرخانې په قلعه نجارا سیمه کې په ۱۳۷۱ کال کې د سوک وهنې کلب جوړ کړ او په کابل کې غلاوې شروع کړې؛ خدای داد د طالبانو په رژیم کې هم د غلا په جرم بندي شوی و.
په کال ۱۳۸۰ کې کله، چې یې غوښتل یو څوک وتښتوي د امنیتي ځواکونو له لوري ونیول شو او بیا د کابل پولیسو له نظارت خونې څخه په تېښته بریالی شو.
نوموړي اعتراف کړی و، چې دی د حبیب ستالف د خلاصون لپاره له پېښور څخه کابل ته راغلی و.
