د افغانستان د روڼتیا څار بنسټ نن د افغانستان کرېکټ بورډ په اړه خپل تازه راپورخپور کړ. د ياد بنسټ راپور ښيي چې کرېکټ بورډ له جدي ننګونو سره مخ دی.
د دغه بنسټ چارواکي وايي، په کرېکټ بورډ کې د اجرايي رییس ټاکنې پروسه سیاسي ده او دغه راز د اجرايي رییس ګمارنه او ګوښه کول هم له کوم موجه دلیل پرته ترسره کېږي.
د راپور لیکوال مشتاق رحیم وايي، د بورډ د مشرتابه پلاوي له دندو ګوښه شوي رییسان په فساد، خپل سرې ګمارنې او د لوبغاړو ترمنځ په نفاق خپراوي تورن وو.
رحیم له دغې چارې نیوکه کوي او وايي، دولت د دغې ادارې له کړنو هېڅ ډول څارنه نه ده کړې.
د افغانستان د روڼتیا څار بنسټ راپور دغه راز څرګندوي چې د کرېکټ بورډ په اداره کې له فساد سره د مبارزې او مخنیوي لپاره هېڅ ډول مکانیزم نه دی موجود.
د افغانستان د کرېکټ بورډ ویاند فرید هوتک وايي، د راپور پایلې او موندنې له دوی سره نه دي شریکې شوي او دوی هم د خواله رسنیو له لارې خبر شوي چې د روڼتیا څار بنسټ په دې اړه څېړنه ترسره کړې.
هوتک زیاتوي، د راپور له لوستلو او د معلوماتو له تحلیل وروسته به د کرېکټ بورډ رسمي نظر شریک شي.
د افغانستان د روڼتیا څار بنسټ په راپور کې راغلي چې د مشرتابه پلاوي یو شمېر نږدې خپلوان په بېلابېلو ټیمو کې ګمارل شوي حال دا چې د دوی له خپلوانو ښه استعداد لرونکي لوبغاړي له پامه غورځول شوي دي.
د افغانستان د روڼتیا څار بنسټ وايي، د افغانستان کرېکټ بورډ د تفتیش په اړه خپل کلنی راپور نه دی خپور کړی او په خپلواکه بڼه د دغې ادارې د پلټنې په اړه هم کوم راپور نه دی موجود.
