د خپلې اوسنۍ روغتیا په اړه مشهوره پرتګالي فوټبال لوبغاړي کریسټیانو رونالډو ټولې ګنګوسې پای ته ورسولې او د ښه والي ډاډ یې ورکړ.

د نوموړي په وینا روغ رمټ دی او د راتلونکې دوشنبې په ورځ دایټالیې په (میلان) ښار کې به د اروپا فوټبال کلپونو اتلولۍ لیګ په فاینل لوبه کې د خپلې لوبډلې په ګټه ولوبیږي.

ټاکل شوې ده، چې د روانې (می) میاشتې په ۲۹ مه نیټه د ۲۰۱۶ م ز کال اروپا فوټبال کلپونو اتلولۍ لیګ سیالیو (فاینل) لوبه کې دوه هسپانوي کلپونه ریال ماډریډ او اټلاټیکو ماډرید د لوبې ډګر ته ووځي.

د یادونې وړ ده، چې د رونالډو د روغتیا او فاینل کې دننه لوبیدو په اړه ګنګوسې وروسته له هغې خپرې شوې، چې دغه لوبغاړی د تمرین پرمهال د یوه لوبغاړي سره وجنګید.

ویل کیږي، چې د کریسټیانو رونالډو روغ رمټ پاتې کیدل نه یواځې د فاینل لوبې له پاره د ریال ماډریډ په ګټه دی ترڅنګ خپل پرتګالۍ فوټبال ملي لوبډله هم د راتلونکې میاشت سترو اروپایي فوټبال سیالیو ته د رونالډو د روغ رمټ پاتې کیدو دعا کوي.

کریسټیانو رونالډو به راتلونکي جون میاشتې په ۱۰ مه نیټه د اروپایي هیوادونو ترمینځ په پیلیدونکو فوټبال جام سیالیو کې مهم لوبغاړی وي.

د یادونې وړ ده، چې د (چمپینزلیګ) په تیرکال سیالیو کې کریسټیانو رونالډو ۱۷ ګولونه ترسره کړي وو، چې اوسمهال په ۱۶ ګولونو څخه د خپل ریکارډ برابرولو څخه ۱ ګول وروسته دی.

دغه راز د کریسټیانو رونالډو روغ رمټ پاتې کیدل د راتلونکې فاینل لوبې له پاره ځکه اړین دي، چې له یوه اړخه سیاله اټلاټیکو ماډریډ یوه بهترینه دفاع لرونکې لوبډله شمیرل کیږي، چې د ماتولو لپاره یې رونالډو له ریال ماډریډ سره بهترینه وسله او ترڅنګ یې له یادې لوبډلې سره د ټپونو له کبله رفیل واران هم شتون نه لري.

د اټلاټیکو ماډریډ د دفاع لیکي قوت له دې هم معلومیږي، چې روان سیزن یې په خپلو ۵۶ سیالیو کې په ۳۵ لوبو کې هیڅ سیالې لوبډلې ته د دوی خلاف د ګول کولو چانس نه دی ورکړی.

نه یواځی دفاع بلکې د ریال ماډریډ خلاف د اروپا فوټبال اتلولۍ ګټلو له پاره له یادې اټلاټیکو ماډریډ لوبډلې سره د رونالډو او بینزیما په وړاندې د ګریزمین او فرنینډو ټوریس په څیر برید کوونکي لوبغاړي هم له ځان سره لري چې د لوبې پریکړې بدلولې شي.