تلیفونیم‌نینگ ساعتی‌نی سیسی اویقودن اویغاته‌دی. یریم اویقو و یریم اویغاق تلیفونیم‌نینگ ساعتی‌نی سیسی‌نی کیسه‌من. قیته‌دن اویقولش‌نی ایسته‌یمن. سحرلیک‌نی ییب و نماز اوقیگنیم‌دن 3 ساعت اوته‌دی؛ لیکن یریم ساعت آلدین اویقوله‌گن دیک کورینه‌من. کوزلریم‌نی زوردن آچه‌من و ساعت گه قره‌یمن، ساعت 7 دن بیر آز اوتگن.
شاشیلینچ بیلن اویقودن توره‌من و سووگه توشیش اوچون حمام باره‌من، ایسیق و ساووق سوونی آچیب و تیزلیک‌ده حمام قیله‌من. حمام دن چیققنیم دن سونگ، کییم‌لریم نی کییه‌من و تیزلیک بیلن یولگه توشه‌من و ایرته‌لب ساعت 8 ده دفترده بولیشیم کیره‌ک. اویدن دفترگچه یریم ساعت دیر و مین هم وقتی بیلن دفترگه ییتیش اوچون وقت اوتکزمه‌یمن.
حمام قیلگن بولسم هم اوزیم‌نی تالیگن حس قیله‌من. حس قیله‌من آش قازانیم درست ایش بیرمه‌یدی و تماغیم‌ده بیران نرسه قالگن دیک کورینه‌دی. سببی هم سحرلیک‌ده ییگن آغیر آوقت دیر کیم، کون دوامیده کوچیم‌نی کوپراق قیلسه کیره‌ک. دفترگه ییتیشگنیم‌دن سونگ وضعیتیم یخشی‌راق بوله‌دی و کیچ قورون گچه ایشیم گه دوام بیره‌من.
کیچ قورون ساعت 4 گه یقین اوی گه قیتیش اوچون تیارگرلیک آله‌من. یولگه توشه‌من، آیاقلریم تالیگن کورینه‌دی، آچلیک و سووسیزلیک اذیت قیله‌دی. هوا ایسیق‌لیگی سبب، آغزیم سووسیزلیک‌دن قوریدی. موترگه مینگنیم دن سونگ، یول دوامیده ملایم شمال وجودیم نی نواز قیله‌دی، خرسندلیک حس قیله‌من و آچلیک بیلن سووسیزلیک بیرآز ایسیم‌دن چیقه‌دی.
موتردن توشگنیم‌دن سونگ، پیاده روگه کیره‌من. بولانی و باشقه قیزدیریلگن آوقت‌لر یول چیکه‌سیده یاییلگن توره‌دی. یاغ و قیزدیریلگن آوقت‌لرنی هیدی ایلگریدن کوره کوپراق آچقاته‌دی. بو هید عادی کونلرده اذیت قیله‌دی، لیکن بو کونلرده آدم نی نواز قیله‌دی.
جاده‌لر موتردن و پیاده رولر آدم‌لردن توله دیر. آدم‌لر تیزلیک بیلن اویگه ییتیش‌نی ایسته‌یدی و ایش‌دن قول تارتگن آدم‌لر باشقه‌لردن کوره کوپراق شاشیلینچ بیلن حرکت قیله‌دیلر. آدم‌لردن کوپینچه‌سی بولانی و آلتین رنگ‌لی پکوره‌لر تامان کیته‌دیلر و افطارلیک اوچون اوزی و عایله‌سیگه بولانی و پکوره ساتیب آله‌دیلر.
پیاده رولرنی باشقه تامانیدن تورلی میوه‌لر ساتیلیش اوچون قوییلگن. سریغ و قیزیل آلمه‌لر، شفتالو، زردآلو، آلو، توت و باشقه میوه‌لر انسانلرنینگ دقتی نی جلب قیله‌دی. بیرقطار کیشی لر میوه ساتیب آله‌دی و بیرقطاری ایسه میوه لرنینگ بهاسینی سوره‌یدیلر. ایلگری باریب بیر-ایکی کیلو میوه آلیب و یولیم گه دوام بیره‌من.
اوی گه ییتیشه‌من، عایله‌نینگ هر بیر اعضاسی بیر ایش بیلن شغللنه‌دی، بیری افطارلیک اوچون بولانی پیشیره‌دی و باشقه بیری کیچه‌نینگ آوقتی‌نی تیارله‌یدی، شونینگدیک، باشقه بیری چلو تیارلب موزلتمه‌ده قویه‌دی. میوه نی آشخانه نینگ میزنی اوستی گه قویه‌من و اوزیم ایسه اتاققه کیره‌من. کییم‌لریم نی اوزگرتیریب و تلیفونیم نی بیر چیکه ده تشله‌یمن. توشک‌لردن بیرینی اوستیگه اوزه‌له‌من و زیریکن‌لیک‌دن اویقولب قاله‌من.
