.jpg)
د کرېکټ نړیوالې شورا لهخوا د افغانستان کرېکټ ملي لوبډلې مرستیال کپتان او په ګوګلي ماسټر مشهور راشدخان ته یو بل زیری هم راغی.
د کرېکټ نړیوالې شورا د رسمي وېبپاڼې د معلوماتو لهمخې، راشدخان د ۲۰ اوریزه لوبو په نړیواله درجه بندۍ کې د لومړي ځل لهپاره د بالرانو په ډله کې لومړي مقام ته رسېدلی دی.
راشدخان د ۲۰ اوریزه لوبو د غوره بالرانو په درجه بندۍ کې دغه مقام له نیوزیلیندي بالر میچل سنټر څخه نیولی دی چې دغه لوبغاړی ۶ مقام ته ګوزار شوی دی.
راشدخان وروسته له هغه د ۲۰ اوریزه لوبو د بالرانو په درجه بندۍ کې لومړی مقام ترلاسه کړ چې روانه میاشت یې په عربي اماراتو کې د زمبابوې خلاف ۲ شل اوریزه لوبو کې ۵ لوبغاړي وسوځول.
دا په داسې حال کې ده چې تېره اوونۍ راشدخان ارمان د کرېکټ نړیوالې شورا په تاریخ کې د لومړي افغان او د دې شورا په تاریخ کې د ځوان لوبغاړي په توګه د ۵۰ اوریزه لوبو د بالرانو په درجه بندۍ کې هم لومړی مقام ترلاسه کړ.
.jpeg)
افغان راشدخان چې اوسمهال له افغان کرېکټ ملي لوبډلې سره ۲۰۱۹ کال ۵۰ اوریزه کرېکټ نړیوال جام سیالیو ته د رسېدو په موخه د غوراوي پړاو لوبولو لهپاره زمبابوې کې دی د لومړي مقام ترلاسه کولو خوشحالي یې د ټویټر څخه په ګټه اخیستلو ښودلې ده.
د راشدخان په وینا، له فخر او ویاړ ډکه شېبه ده چې په ۲۰ اوریزه بالرانو درجه بندۍ کې هم لومړي مقام کې اعلان شو او د خپلو مینهوالو له مینې او ملاتړه یې مننه کړې ده.
راشدخان یوازېنی افغان لوبغاړی دی چې د بنګلهدېش، هندوستان، ویسټ انډيز او اسټرالیا په سوداګریزو کرېکټ لیګونو کې لوبېدلی دی او سږکال به د انګلستان په کورنیو کرېکټ سیالیو کې هم راښکاره شي.
د کرېکټ نړیوالې شورا لهخوا د شل اوریزه لوبو په نوې اعلان شوې درجه بندۍ کې نیوزیلنیډي بیټسمین کولن منرو لومړی او اسټرالوي ګلین مکسویل دویم مقام ترلاسه کړی خو په درې اړخیزه ۲۰ اوریزه سیریز کې د اسټرالوۍ لوبډلې د اتلولۍ سره سره پاکستان بیا د هېوادونو په ډله کې لومړی مقام له ځان سره ساتلی دی.
همدارنګه د شل اوریزه لوبو د الراونډرانو په ډله کې محمد نبي عیسی خېل بیا د اسټرالوي ګلین مکسویل او بنګلهدیشي شکیب الحسن وروسته دریم مقام خپل کړی خو افغان محمد شهزاد د بیټسمینانو په ډله کې په لسم مقام کې اعلان شوی دی.
