د پوهنې وزارت مسوولانو د ښوونکي ورځې نمانځغونډې کې وویل چې د ښوونیز نظام ظرفیت لوړولو په موخه به ۲۴ زره نوي بستونه جوړ کړي.
د پوهنې وزارت سرپرست وزیر میرویس بلخي وايي، یاد ښوونکي به په ۱۳۹۸ ل کال په پیل کې تر رقابتي ازموینې وروسته وګومارل شي.
د نوموړي په وینا، دغه ۲۴ زره بستونه به ډېر ژر اعلان شي او رقابتي ازموینې به یې هم د ۱۳۹۷ ل کال تر پایه واخیستل شي.
د پوهنې وزارت سرپرست زیاتوي، په پام کې لري چې له لوړو زدهکړو وزارت سره په همغږۍ د ښوونکیو ظرفیت لوړونې پروګرامونه هم جوړ کړي.
د پوهنې وزارت مسوولان دغه راز د ښوونکیو لهپاره د هېواد په کچه د قرضې صندوق جوړولو، د هغوی لهپاره په ۲۸ ولایتونو کې د ښارګوټو جوړولو او د ښوونکیو د معاشونو لوړولو خبر هم ورکړ.
دا په داسې حال کې ده چې شاوخوا ۳ میاشتې وړاندې په کابل کې له زرګونو ښوونکیو رقابتي ازموینه واخیستل شوه چې په پایله کې یې ۸ زره ښوونکي د پوهنې وزارت په چوکاټ کې وګومارل شول.
