فرانسې او اسټرالیا د هغو طالب بندیانو له خوشې کولو سره مخالفت څرګند کړ چې وايي، فرانسوي او اسټرالیايي سرتېري یې وژلي دي.
د اسټرالیا د بهرنیو چارو وزیرې ماریس پين د جمعې په ورځ رویټرز خبري اژانس ته ویلي، هېواد یې د هغه افغان سرتېري له خوشې کېدو سره مخالف دی چې په ۲۰۱۲ کال یې ۳ اسټرالیايي سرتېري وژلي وو.
دغه راز د فرانسې د بهرنیو چارو وزارت هم پرون د هغو طالب بندیانو د خوشې کېدو په تړاو اعتراض وکړ چې وايي دوه فرانسویان یې وژلي دي.
د فرانسې د بهرنیو چارو وزارت په بیانیه کې ویل شوي، فرانسه یو ځل بیا د هغو طالب بندیانو له خوشې کېدو سره مخالفت څرګندوي چې د فرانسوي وګړيو پر وړاندې یې په جنایت لاس پورې کړی او په بشري ضد جرمونو محکوم شوي دي.
طالبان وايي، دغه ۶ طالب جنګیالي پرون د قطر پلازمېنې دوحې ته رسېدلي.
ټاکل شوې دغه کسان په قطر کې یوه امریکايي اډه کې وساتل شي او پر تګ راتګ به یې بندیز وي.
