د هندوستان په کلکتې کې د کرکټ نړۍوالی شورا په روانې عمومي غونډې کې یو شمېر پرېکړې وشوې او د ۲۰۱۹ کال ۵۰ اوریز کرکټ نړۍوال جام د ځېنو مهمو سیالیو مهالوېش هم اعلان شو. د دې جام پیلیدو ته له ننه پوره ۴۰۰ ورځې پاتې دي.
د کرېکانفو وېبپاڼې د معلوماتو لهمخې، د راتلونکي کال ۵۰ اوریز کرکټ نړۍوال جام سیالۍ به د کوربه انګلستان او سویلي افریقا کرکټ ملي لوبډلو ترمنځ په سیالۍ سره پیل شي.
ټاکل شوې، دا لوبه به د راتلونکي ۲۰۱۹ کال می په ۳۱مه د انګلستان په پلازمېنه لندن «اوول» لوبغالي کې وشي.
همدارنګه د پاکستان او هندوستان کرکټ ملي لوبډلو ترمنځ لوبه چې په نړۍ کې ورته بېشمېره مینهوال انتظار دي؛ د جون په ۱۶مه په «اولډ ټریفیډ» لوبغالي کې وشي.
له پاکستان سره د سیالۍ مخکې به هندۍ کرکټ ملي لوبډلې د نړۍوال جام لومړۍ لوبه د جون په ۵مه له سویلي افریقا کرکټ ملي لوبډلې سره وکړي.
همدارنګه انګلستان او اسټرالیا به د جون په ۱۹مه په «لارډز» کې او اسټرالیا او نیوزیلینډ د جون په ۲۹مه په لارډز کې وشي.
دا به پنځم ځل وي چې انګلستان د ۵۰ اوریز کرکټ نړۍوال جام سیالیو کوربتوب کوي چې نیمه پایلوبې به یې د جولای په ۹مه او ۱۱مه په «اولډ ټریفیډ» او «ایجباسټن» لوبغالي کې؛ خو پایلوبه به د جولای په ۱۴مه په «لارډز» کی وشي.
افغانستان هم د راتلونکي کال نړۍوال جام سیالیو ته لاره پیدا کړېده او ټاکل شوې چې له ټولو ګډونوالو لوبډلو سره ولوبېږي.
د نورو پرېکړو لهمخې، هندي کرکټ بورډ د راتلونکي کال ۱۲م پړاو (ای. پي. اېل) سیالۍ هم نږدې ۱۰ ورځې رامخکې کړي چې نړۍوال جام کې د لوبېدلو مخکې لږ تر لږه ۱۵ ورځې فاصله ولري او د نوې پرېکړی لهمخې به (ای. پي. اېل) کرکټ سیالۍ د مارچ له ۲۷ د می میاشتې تر ۱۹مې ترسره شي.
همدارنګه د اجرایوي مشرانو په غونډه کې د ۲۰۱۹ کال تر ۲۰۲۳ کال پورې د راتلونکیو ۵ کالونو پروګرام هم تصویب شو چې د افغانستان په ګډون به لوبډلې پهکې یو بل سره ټېسټ، ۵۰ اوریزې او ۲۰ اوریزې سیالۍ وکړي.
که څه هم د افغانستان کرکټ بورډ دوو چارواکیو عمومي مشر عاطف مشعل اواجرایوي مشر شفیقالله ستانکزی هم د هندوستان په کلکته کې د کرکټ نړۍوالې شورا په ۵ ورځنۍ غونډې کې برخه اخیستې؛ خو تراوسه د افغانستان کرکټ ملي لوبډلې د لومړۍ سیالۍ د نېټې او سیالې لوبډلې په اړه معلومات نهشته.
په ۲۰۱۹ کال په ۱۲م پړاو ۵۰ اوریز کرکټ نړۍوال جام سیالیو کې د افغانستان په ګډون د کرکټ نړۍ ۱۰ مخکښې کرکټ لوبډلی برخه لري چې لوبډلې به پهکې د رسمي سیالیو مخکې په رسمي تمریني سیالیو کې هم د انګلستان په ۱۱ بېلابېلو لوبغالیو کې د اتلولۍ په پار سیالۍ وکړي او اسټرالیا به پهکې د خپلې تېرې اتلولۍ څخه دفاع کوي. اسټرالیا په ۲۰۱۵ کال کې نیوزیلینډ ته په ماتې ورکولو سره جام ګټلی و.
