د هغو ۴ سوو طالب بندیانو خوشې کول چې وايي په لویو بریدونو او درنو جرمونو کې یې لاس درلود، د جګړې د قربانيانو د کورنیو له نیوکو سره مخ شوي دي.
د قربانیانو کورنۍ وايي، د سولې مشورتي لویې جرګې پرېکړه ناقانونه او د عدالت وژنه ده. د دغو کورنیو غړي وايي، د سولې په مشورتي لویه جرګه کې د جګړې د قربانیانو کورنیو ته ونډه نه وه ورکړل شوې.
د دوی په وینا، حکومت د عدالت له پامه غورځولو سره نه شي کولای تلپاتې سولې ته ورسېږي.
د جګړې د قربانیانو کورنیو دوه غړي یاسر قبادیان او روحالله رها وايي، په لویه مشورتي جرګه کې د جګړې د قربانیانو استازي نه وو او حکومت باید هغوی نه وای خوشې کړي.
د دوی په وینا، د عدالت په نقض او د قربانیانو وینې ته نه درناوی نه شي کولای په هېواد کې تلپاتې سوله راولي. دوی د ۴۰۰ طالب بندیانو خوشې کول د جګړې د قربانیانو وینې ته سپکاوی بولي.
د افغانستان د ډیموکراسي او بشري حقونو بنسټ اجرايوي مسوول جواد زابلستاني وايي، که څه هم حکومت هڅه کوي چې د طالب بندیانو په خوشې کولو سره د سولې بینالافغاني خبرې اترې پیل او په پای کې سولې ته ورسېږي، خو له عدالت پرته سوله، د قانون تر پښو لاندې کولو په مانا ده.
خو د ولسمشر د ویاند مرستیاله درانۍ جاوید وزیري وايي، طالب بندیان د ولس او ټولنې د ټولو پوړونو د استازو په مشورې خوشې کېږي.
که څه هم حکومت د پاتې ۴۰۰ طالب بندیانو پر نه خوشې کولو ټینګار کاوه، خو ولسمشر محمداشرف غني د سولې لویې مشورتي جرګې له پرېکړې وروسته د دغو بندیانو د خوشې کولو فرمان صادر کړ.
