د ازادو رسنیو ملاتړ بنسټ یا نی ۲۰۱۶ زېږدیز کال د خبریالانو له پاره خونړۍ بللی دی.
د دې بنسټ مسوولین وايي، په روان میلادي کال کې له خبریالانو د شوي تاوتریخوالي ۴۱۵ پېښې ثبت شوي، چې د تېر کال په پرتله زیاتوالی ښيي.
د نی بنسټ اجرایوي مشر مجیب خلوتګر نن ورځ (پنج شنبه) په خبري غونډه کې وویل، چې له دې جملې ۱۴ یې د قتل پېښې، ۳۸۸ یې د مرګ ګواښونه، ۴۳ یې د وهلو او ټکولو پېښې، ۲۳ یې د ټپي کېدلو پېښې او ۳ هغه یې د خبریالانو نیولو پېښې شاملې دي.
خلوتګر وویل، د تاوتریخوالي ۳۲۶ پېښو عاملین طالبان، ۶۴ پېښو عاملین دولتي بنسټونه او د ۲۶ پېښوعاملین بیا ناپېژنده کسان دي.
د نی موندنې ښيې، د طالبانو له خوا له خبریالانو سره د شوي تاوتریخوالي له جملې ۲۹۲ پېښې یې په ډله ییزه توګه په هلمند، کندوز، روزګان او فراه ولایتونو کې ثبت شوي دي.
دغه راز، د ازادو رسنیو ملاټر بنسټ یا نی د ۲۱۰۶ کال په وروستیو میاشتو کې د رسنیو له ۲۸۰ ښځینه کارکوونکو سره مرکې کړې، چې د دې ډلې ۸۳ سلنې ویلي، په ټولنه کې ورسره تاوتریخوالی شوی دی.
له دې جملې د رسنیو ۴۳ سلنه ښځینه خبریالانو ویلي، چې د کاري مسلو په اړه ورسره زور زیاتی شوی دی.
د دې څېړنې پربنسټ د رسنیو ۲۰ سلنه ښځینه کارکوونکو په کاري چاپیریال کې د تاوتریخوالي ختمېدو خبر ورکړی، خو ۸۰ سلنه نورو يې ویلي، چې ګومارونکي سازمان يې د تاوتریخوالي له منځه وړلو له پاره هېڅ نه دي کړي.
د نی راپور وايي، له دې وېرې چې خبریالانې خپلې دندې له لاسه ورنه کړي، د تاوتریخوالي په برخه کې د رسنیو مسوولین نه دي خبر کړي.
د نی د موندنو له مخې ۸۳ سلنه مرکوونکو ویلي، تاوتریخوال ورسره شوی دی، چې ۱۰ سلنه یې په کاري سازمانونو او ۸۹ نور یې له سازمانه په بهر چاپېریال کې شوی دی.
.png)
د دې بنسټ راپور کاږي، چې د شوي تاوتریخوالی ۷،۱ سلنه یې فزیکي، ۵۵ سلنه یې لفظي، ۲۶،۵ سلنه یې جنسیتي او ۱۱،۳ سلنه یې په بېلابېلو ډولو شوی دی.
خبریالان وايي، د تاوتریخوالي راکمېدو له پاره باید د حکومت له خوا د خبر رسونې قوانین تطبیق او په هېواد کې امنیت تامین شي.
خبریالې فرحناز فروتن سلام وطندارته ویلي، چې په افغانستان کې د خبریالانو وضعیت اندېښمنونکی دی او دوی خپل کوچني حق ته هم لاس رسی نه لري.
له دې ټولو سره سره نی وايي، چې دوی له خبریالانو سره د تاوتریخوالي دوسیې چمتو کړي او ډېر ژر به د څېړنې له پاره ارګ، کورنیو چارو وزارت او څارنوالۍ ته ولېږي.
