جاپان هېواد د ملګرو ملتونو د ماشومانو لهپاره د وجهي صندق (یونیسف) سره د یوې غونډې پرمهال د افغانستان له پاره د ۱۲،۴ میلیونو ډالرو په ارزښت د ژوند ژغورونکيو واکسینونو تړون لاسلیک کړ.
د عامې روغتیا وزارت چارواکي وایي، چې د دې تړون له مخې به د ۱،۳ میلیونو ماشومانو او ۶ میليونو هغو مېرمنو ته چې د اومیندوارۍ عمر ته رسېدلي وي؛ واکسینونه واخیستل شي.
غونډې ته د عامې روغتیا وزارت وزیر فیروزالدین فیروز وویل، د هېواد د ماشومانو له پاره واکسین د دوی په لومړیتوبونو کې دی، چې په مرسته به یې د ډېرو ماشومانو او میندو ژوند وژغورل شي.
د عامې روغتیا وزیر زیاته کړه، یونیسف اداره به د دې مرستې په واسطه افغانستان ته د تبرکلوز، پولیو، تور زېړي، شري او تیتانوس واکسینونه وپېري.
د فيروز همدارانګه وویل، چې دغه واکسینونه به د ورځني پروګرام له لارې ۱،۳ میلیونو ماشومانو ته چې عمرونه یې له یو کاله کم وي او ۶ میلونو مېرمنو ته چې د اومیندوارۍ په جریان کې وي؛ تطبیق شي.
د ده په خبره، چې دا واکسینونه به په څلورو ځلو سراسري او له څلورو نه په ډېر ځله په فرعي کمپاینونو کې په هغو ولایتونو کې چې د پولیو خطر سره مخ دي؛ تطبیق شي.
غونډې ته په افغانستان کې د جاپان سفیر مستوجي سوزاکا د خپلو خبرو په دوام له افغانستان سره د جاپان د مرستو په اړه وویل، جاپان غواړي، چې د نورو برخو ترڅنګ له افغانستان سره د روغتیا په برخه کې هم خپلې مرستې جاري وساتي.
غونډې ته د ملګرو ملتونو د یونیسف ادارې استازې ادل خضر هم وویل، چې ژوند ژغورونکي واکسینونه د دې لامل شوي، چې د مور او ماشوم د مړینې کچه راټیټه کړې ده.
مېرمن خضر وویل، چې په ۲۰۱۵ کال کې د پولیو ۲۰ پېښې ثبت شوې وې، چې دغه شمېره په روان کال کې د ژوند ژغورونکیو واکسینونو په مرسته ۱۲ ته راټیټه شوې ده.
