افغان کرکټ بورډ دیوې خبرپاڼې په خپرولو سره وایي چې ښایي د پاکستانۍ کرکټ ملي لوبډلې د نامتو لوبغاړي یونس خان په مشرۍ د خیبرپښتونخوا کرکټ لوبډله د افغانستان میلمنه شي.
کرکټ بورډ وایي چې ټاکل شوې ده د خیبرپښتونخوا د ۳ بیلا بیلو زونونو د مخکښو کرکټ لوبغاړو څخه جوړه دغه لوبډله به د افغانستان کرکټ ملي لوبډلې او (الف) لوبډلو سره لوبې ترسره کړي خو د میلمه لوبډلې دراتګ د نیټې په اړه یې څه نه دي ویلي.
کرکټ بورډ وایي چې دغه لوبډله یې د ایرلینډ په کوربتوب کیدونکي شل اوریزه کرکټ نړیوال جام ټاکنیز پړاو لوبو ته دافغان کرکټ ملي لوبډلې د ښه چمتووالي په موخه رابللې ده.
د کرکټ بورډ خبرپاڼه زیاتوي چې د خیبرپښتونخوا منتخبه کرکټ لوبډله به د افغان کرکټ ملي لوبډلې سره لومړې ۳ شل اوریزه لوبې ترسره کړي او د هغې وروسته به د افغانستان (الف) کرکټ ملي لوبډلې سره ۳ یو ورځنۍ او 2 څلور ورځنۍ لوبې وکړي.
کرکټ بورډ لیکي چې ددې سیالیو موخه داده، چې افغان لوبډلې نړیوالو سیالیو ته ښه چمتووالې ونیسي ، په کور دننه ښه کرکټ وکړي او دغه راز کابل کرکټ نړیوالې لوبغالې د نړیوالو سیالیو کوربتوب ته برابر کړي.
د کرکټ بورډ خبرپاڼه د خپل اجرایوي مشر شفیق الله ستانکزي له خولې لیکي چې په ډیره مشکله یی د خیبرپښتونخوا کرکټ چارواکو او یو شمیر پاکستاني ملي کرکټرانو ته قناعت ورکړ چې افغانستان ته دسیالیو لپاره راشي.
ښاغلي ستانکزي زیاته کړه چې دا دافغانستان ولس لپاره د ویاړ ځای دې چې دلومړي ځل لپاره به په کابل کرکټ نړیوال لوبغالي کې بهرني کرکټران ولوبیږي.
د نوموړي په وینا چې د خیبرپښتونخوا کرکټ لوبډلې په کوربتوب سره به افغان کرکټ ملي لوبډلو ته د ښوو لوبو او تمریناتو زمینه برابره شي ترڅنګ به یې په راتلونکې کې افغانستان کې د نورو نړیوالو سیالیو او نړیوالو لوبغاړو د کوربتوب لپاره زمینه برابره کړي.
دیادونې وړ ده چې ددې وړاندې افغان کرکټ بورډ د (یونیسیف) سفیران ورینډر سیهواګ او سچن ټنډولکر په شمول له هندي ستورو کرکټرانو غوښتي وو چې افغانستان ورشي خو د کرکټ ملي لوبډلې د هغه مهال منیجر بشیرستانکزي ویلي وو چی دواړو مالي ملاتړ د سفر لپاره ترلاسه نکړای شو او دغه سفر ونشو.
له دې وړاندې کله چې افغان ولسمشر پاکستان ته سفر کوه نو هلته د افغان کرکټ لوبډلې او د پاکستان کرکټ ای لوبډلې ترمنځ هم یوه سیالي تر سره شوه چې ولسمشر اشرف غني او نواز شریف یې هم نندارې ته راغلي و.
ددواړو هیوادونو د لوړ پوړو چارواکو پر وړاندې د کرکټ دوستانه خو سخته سیالي ترسره شوه او په پای کې افغان کرکټ لوبډلې وکولی شول چې پاکستانۍ لوبډلې ته ماتې ورکړي.
