د کډوالو او راستنېدونکیو چارو وزارت نن د کابل بېځایه شویو لپاره د دایمي حللارې موندلو په موخه د «د کابل د عمل پلان جوړولو» په نوم یو ورځنی روزنیز پروګرام پیل کړ.
د دغه وزارت وزیر سیدحسین عالمي بلخي وايي، د کابل د عمل پلان له مخې به دغه وزارت په کابل کې د راستانه شویو کډوالو او کورنیو بېځایه شویو لپاره اسانتیاوې برابرې کړي.
د بوختیاوو او زدهکړو اسانتیاوو برابرول، روغتیايي خدمتونه او د ځمکې او د اوسېدو د ځای وېش هغه موخې دي چې ټاکل شوې د کابل د عمل پلان له لارې په کابل کې د کورنیو بېځایه شویو لپاره عملي شي.
بلخي د کورنیو بېځایه شویو، کډوالو او راستانه شویو کډوالو د ستونزو حل لپاره ملي او نړیوالې همکارۍ اړینې وبللې.
هغه کورني بېځایه شوي د جګړې له کبله بولي او وايي چې جګړه په یوه ملي او نړیواله ستونزه بدله شوې ده. نوموړی زیاتوي: «هغه ملت چې ډېره برخه نسل یې جګړې ځپلی وي، له نامهربانۍ، قتل او وژلو پرته یې بل څه نه وي تجربه کړي، د هغوی لپاره د سولې هیله یو خوب دی.»
د کډوالو راستنېدونکیو چارو د وزیر په وینا، د ملي یووالي حکومت د ۵ کلونو پر مهال شاوخوا ۴ میلیونه کسان په کور دننه بېځایه شوي دي.
د یاد وزارت مسوولان وايي چې په پاکستان کې یې د افغان کډوالو لپاره له دغه هېواده د دایمي اقامې د ورکړې غوښتنه کړې ده.
