د افغانستان هلمند ولایت د شمالي ولسوالیو څخه ترلاسه شوي راپورونه وايي، چې د وسله والو طالبانو د کوټې شورا مهم غړي د دغه ولایت په موسی کلا ولسوالۍ کې ځای پر ځای شوي دي.
د یاد ولایت د شمالي ولسوالیو کې له تیرو څو ورځو راهیسې داسې ګنګوسې وې، چې ګواکي وسلهوالو طالبانو خپله شورا د هلمند ولایت موسی کلا ولسوالۍ د "سري ګاري" سیمې ته راوړي او هلته مېشت شوي دي.
خو داسې ښکاري، چې ګنګوسې اوس په حقیقت بدليدونکی دی او د ځايي خلکو له خوا تایید شوي هم دي.
د موسی کلا ولسوالۍ اوسیدونکي وایي، چې د کوټې شورا ځينې کسان یې هلمند ته ور رسیدلي، خو بشپړځای او معلومات د رسنیو په واک کې نه ورکوي .
د دوی پر خبره، یوشمیر نظامي لوړپوړي مسوولین یې هم هلته شته، خو د کوټې شورا لوړپوړو چارواکو په اړه تردې دمه څه نه دي ویل شوي.
د کجکي ولسوالۍ اوسیدونکی او د سولی شورا ولایتي مسول فضلالباري فیاض سلام وطندار ته وویل، چې دی د دوی د بشپړې رهبرۍ د انتقال کیدو په اړه تراوسه معلومات نه لري.
خو د وسلهوالو طالبانو ویاند ذبیح الله مجاهد رسنیو ته په لیږل شوي پیغام کې ویلي، چې دوی خپل دکوټې شورا هلمند ته رانتقال کړی او هملته ځای پرځای شوي دي.
د هلمند د ۲۱۵ میوند قول اردو قوماندان جنرال ولي محمد احمدزایي وایي، چې دوی شپه او ورځ د وسلهوالو طالبانو پټنځایونه څاري، خو تراوسه یې په دې اړه کره معلومات نه دي ترلاسه کړي.
نوموړي زیاته کړه، چې د وسلهوالو طالبانو یو شمېر مسوولین يې د هوا له لارې څارلي او وژلي يې دي.
د احمدزایي پرخبره، چې د وسلهوالو طالبانو د کوټې شورا تردې دمه لا نه ده انتقال شوې.
د هلمند والي حیاتالله حیات بیا د وسلهوالو طالبانو دغه خبرې ردوي او وایي، وسلهوالوطالبانو کوټې کې خپله شورا له یوه ځایه نه بل ځای ته انتقال کړې ده.
د هلمند والي وایي، د دوی نظامي مسوولین هلته شته، خو هغه کسان چې د شوراغړي دي تر اوسه نه دي ورغلي.
د هلمند والي وایي، چې طالبانو هڅه کوله، څو ولایتونه سقوط کړي اووروسته خپله شورا همدلته راوړي او ځای پرځای یې کړي.
هلمند کې وسلهوالو طالبانو داسې مهال د خپلې شورا د انتقال په اړه خبرداری ورکړی، چې په یاد ولایت کې ولایتي چارواکي د وسلهوالو طالبانو دغه خبرې یوه ادعا بولي او وایې، تر دې دمه د کوټې شوراهیڅوک هم نه دي لېږدولي که څه هم دهلمند په نهو ولسوالیو کې وسلهوال طالبان دا مهال حاکمیت لري.
