د کونړ په څوکۍ کې د محلي پولیسو پر قرارګاه ځانمرګی برید شوی

د کونړ د امنیې قوماندانۍ ویاند فرید دهقان وایي، نن ماښام شاوخوا اته بجې د کونړ ولایت څوکۍ ولسوالۍ کې د محلي پولیسو پر قرارګاه ځانمرګی برید شوی، چې له امله یې ۸ پولیس وژل شوي او څفور نور ټپیان دي.
د څوکۍ ولسوال شاه خسرو بیا سلام وطندار سره خبرو کې د پېښې پخلی او ویلي یې دي چې پلی ځانمرګی بریدګر د محلي
پولیسو قرارګاه ته دننه شوی او هلته ځان ته چاودنه ورکړې.
د محلي پولیسو دا قرارګاه د یادې ولسوالۍ په بابړو نومي سیمه کې ده.
دې قرار ګاه ته ورڅېرمه د ملي اردو او عامه نظم کنډکونه هم پراته دي.
ویل شوي، پلي ځانمرګي بریدګر د محلي پولیسو د قرارګاه پيره دار له ویشتلو وروسته یادې قرارګاه ته ننوتی.
د څوکۍ ولسوال شاه خسرو وايي، دغه پېښه کې د څوکۍ ولسوالۍ د محلي پولیسو قومندان عظیم ګل زخمي شوی دی.
ولسوال وايي، دغه پېښه کې د قرارګاه نیمه وداني راپرېوتې او یو شمېر پولیس ترې لاندې دي، نو ممکن د پېښې د قربانیانو شمېرو کې تغیرات راشي.
د کونړ د عامې روغتیا رییس ډاکټر عزیز الرحمان ساپي سلام وطندار ته وویل، د څوکۍ له پېښې اسداباد ولایتي او څوکۍ سیمه ییز روغتون ته شپږ جسدونه او دوه ټپیان وړل شوي، چې ټول سیمه ییز پولیس دي.
هغه د دوو ټپي پولیسو روغتیايي حالت ښه ښودلی.
د څوکۍ ولسوالۍ ځینو محلي پولیسو د نوم نه خپرولو په شرط سلام وطندار ته ویلي، یاده پېښه کې اته پولیس وژل شوي او اوه نور ټپیان دي.
تر اوسه کومې وسله والې ډلې د دې پېښې مسئولیت نه دی منلی.
څوکۍ د کونړ هغه ولسوالي ده، چې نږدې نیمه برخه، دیوه ګل دره، یې د داعش ډلې په ولکه کې ده.