د کندوز والي اسدالله امرخیل د دغه ولایت د سقوط په اړه اوازه د طالبانو پروپاګند وبلله او زیاته یې کړه، چې مخالفین غواړي په دې ډول تبلیغاتو د خلکو روحیه کمزوري کړي.
د امرخیل پر وینا د افغان ځواکونو په تازه هوایي بریدونو کې د طالبانو مرکزونه په نښه شوي او هغوی يې ډیر کمزوري کړي دي.
د کندوز والي ډاډ ورکوي، چې ډیرژر به په یو شمیر کلیو کې ځمکني عملیات هم پیل شي.
وروستیو نا امنیو یو ځل بیا کندوزیان اندېښمن کړي دي.
د دوی ترمنځ داسې ګنګوسې خورې دي، چې ګواکي له اختر وروسته یوځل بیا طالبان پر کندوز برید کوي.
خو د کندز والي اسدالله امرخیل نن دوشنبه (جولای۴مه) په دغه ولایت کې د امنیه قوماندان او په ولسي جرګه کې د یاد ولایت د استازې فاطمې عزیز په ګډون خبري غونډی ته وویل، چې طالبان د ناټو او افغان ځواکونو په هوایي بریدونو کې کمزوري شوي او د کندوز د بیا سقوط ارمان به ګور ته یوسي.
د کندوز والي زیاته کړه، چې لومړی هوایي ځواکونه د طالبانو مهمې څیرې او پټ ځایونه له منځه وړي او له اختروروسته به په کلیو کې چاڼیز عملیات پیل کړي.
خو د ولسي جرګې غړې فاطمه عزیز په کندوز کې د ناامنیو د زیاتیدو په اړه اندیښنه وښوده او زیاته یې کړه، چې د عملیاتو په اړه د چارواکو له تکراري ژمنو خلک ستړي شوي.
میرمن عزیز غوښتنه وکړه، چې د کندوز د ژغورنې په موخه باید ژر تر ژره په عملي توګه د طالبانو پرضد عملیات پیل شي.
امرخیل همدا ډول خلکو ته د اختر په ورځو کې د امنیت ډاډ ورکړ او زیاته کړه یې کړه، چې د اختر په ورځو کې د ښاري نظم په موخه دغیر مسوولو کسانو له خوا د وسلو په لیږد او د بې اسنادو موټرونو په تګ راتګ بندیزلګول شوی.
دغه راز د کندوز امنیه قوماندان جنرال محمد قسیم جنګل باغ په دې خبري ناسته کې وویل، له هغو کسانو سره به جدي چلن وکړي، چې د اختر په پلمه هوایي ډزې کوي.
