د کندوز د سقوط پر مهال د یو شمېر ویجاړو شویو کورونو څښتنان؛ د ژمي په رانږدې کېدو سره انديښمن ښيي او پر حکومت تور لګوي، چې د دوی په اړه بې پروايي کوي.
د کندوز ولایت هغو اوسېدونکیو چې طالبانو ته د دغه ولایت د ځېنو سیمو د ورتګ پرمهال يې کورونه وران شوي؛ سلام وطندار ته وویل، چې د کورونو د بیارغونې له پاره يې تر اوسه پورې د حکومت مرسته نه ده ترلاسه کړې او خپله هم د کورونو د بیارغونې توان نه لري.
د دوی پر وینا، د ورځې له خوا ټوله کورنۍ په پرانیستې فضا کې ناست وي؛ خو د شپې له خوا اولادونه د خپلوانو کورونو ته لېږي.
د کندو په جګړو کې زیانمنه شوې د پنځو اولادونو کونډه مور فاطمه وايي، له اته کلن کونډون سره هم مهاله په یو ګروي کور کې اوسېدله، چې د جګړې پر مهال یې کور بمبار شو او د ۵۰ کالو راټوله کړې هستي یې په کې وسوځېدله.
د دې په خبره، تراوسه يې له حکومته د مرستې په نوم هېڅ هم نه دي لیدلي.
امان الله له هم د همدې زیانمنو له ډلې دی، چې د کور له زیانمنېدو وروسته یې ښه ورځ نه ده لیدلی. دی وايي، په خوارۍ یې کور اباد کړ؛ خو په څو شېبو کې د جنګ خوراک شو.
امان الله له حکومته غوښتنه کوي، چې د ژمي له راتګ سره سم ورسره مرستې وشي، چې دوی او ماشومان یې د ژمي له وژونکیو څپو خوندي پاتې ښي.
د کندوز د والي ویاند سید محمود دانش هم مني، چې په دغه ښار کې له ۱۰۰ زیات د استوګنې کورونه ویجاړ شوي او حکومت تر اوسه د هغو خاوندانو ته د رسېدلي زیان تاوان نه دی ورکړی.
د ښاغلي دانش پر وینا، حکومت په پام کې لري،چې ډېر ژر به د دغه ولایت د زیانمنو شویو کورنو څښتنانو ته د رسېدلي زیان تاوان په اړه پریکړه وکړي.
خو دی وايي، چې د ژمي په رارسېدو سره د لومړۍ او دویمې ناحیې اوسېدونکیو ته لومړۍ ضروري مرستې رسېدلي او د څلورمې او پنځمې ناحیې کسانو ته مرستې دوام لري.
د کندوز د والي ویاند، دا مرستې د یاد ولایت جګړه ځپلو له پاره کافي نه بولي، وايي، سیمه ییزه اداره هڅه کوي، چې د کندوز اړمنو خلکو ته د نړیوالو بنسټونو پام ور وګرځوي.
د سیمه ییز ادارې د شمېرو پر بنسټ شاوخوا ۴۰ زره کورنۍ په دغه ښار کې اوسېږي، چې ۱۴۸۰۰ کورنۍ يې مرستې ته اړتیا لري.
