دې وروستیو کې د کندوز له اوسېدونکیو سره اندېښنې زیاتې شوېدي او ټول وېره لري چې ښار به بیاځلې د طالبانو او امنیتي ځواکونو ترمنځ د نښتې په ډګر بدل شي.
په کندوز ښار د طالبانو د برید خبر پېچلی دی او اوسېدونکي يې وايي چې وسلهوال د ښار تر دروازو ور رسېدلي او ښار هم په پوځي اډې بدل شویدی.
د کندوز دوه اوسېدونکي احمد جاوید او ابراهیم وايي، د کندوز دوه ځلې سقوط، خلکو ته درانه زیانونه او تلفات اړولي، او اوس خلک د طالبانو د بیاځلې برید زغملو وس نهلري.
دوی زیاتوي، د ناامنیو او غلاوو له وېرې له شاوخوا کورونو سره په مشورې د پېرې کولو نوبت اېښی دی او له همدې وېرې هېڅوک ماښام ناوخته نهشي ګرځېدلی.
د کندوز ولایتي شورا یو غړی هم د حکومت له ناکامه عملیاتو شکایت کوي، وايي چې د طالبانو د احتمالي بریدونو د مخنیوي لهپاره باید د کندوز ښار په شاوخوا کې پراخ عملیات پیل شي.
د ولایتي شورا غړی امرالدین ولي وايي، که دغه ولایت کې طالبان ونه ځپل شي؛ د کندوز د سقوط وېره ځکه شته چې امنیتي ارګانونو د ښار دفاعي کمربند تر ښاره پورې محدود کړی دی، د ده په یونا دا کمربند باید له ښاره بهر یو لېرې ځای ته انتقال شي او له هماغه ځایه دفاعي حالت غوره شي.
د کندوز امنیه قوماندان عبدالباقي نورستاني د دې ولایت اوسېدونکیو ته ډاډ ورکوي چې طالبان په کندوز ښار د برید کولو توان نهلري او اوس هم د کندوز ښار ځېنو برخو کې پوځي عملیات روان دي.
د ښاغلي نورستاني په وینا، د ولسوالیو په کچه هم عملیات پیلېږي او هغه سیمې تصفیه کوي چې هلته د دوښمن ګواښ موجود وي.
د کندوز والي عبدالجبار نعیمي وايي، د دې ولایت اوسېدونکیو سره ژمنه کوي چې کندوز به بیا ځلې سقوط ونهکړي.
د هغه په وینا، د ځانګړې قطعې ځواکونه د مخالفانو د بریدونو دفعه کولو ته پوره چمتووالی لري.
طالبان دا وخت د کندوز درېیوو ولسوالیو او ځېنو نورو برخو کې پراخ حاکمیت لري.
له دې مخکې یو ځل په بشپړ ډول د کندوز ښار طالبانو نیولی و او د دویم ځل لهپاره یې په دې ښار پراخ بریدونه وکړل چې بېرته د امنیتي ځواکونو له لوري په شا وتنبول شول.
