د کرنې اوبولګونې او مالدارۍ وزارت له خصوصي شرکتونو سره د ۱۱۹ میلیونو افغانیو په ارزښت ۱۷ تړونونه لاسلیک کړل، چې له پلي کېدو وروسته به د افغانستان په زراعتي محصولاتو کې ۲۰ سلنه زیاتوالی راشي.
د یاد وزارت چارواکو د شنبې په ورځ کابل کې د اوبو لګولو ۱۷ شبکو تړونونه له ۱۷ خصوصي شرکتونو سره لاسلیک کړل.
د دغه وزارت مالي او اداري معین عبدالقادر جواد وايي، داوبو لګولو دغه شبکې به په کابل، پروان او لوګر ولایتونو کې پلې شي، چې پېسې به یې هم د دغه وزارت له پراختیايي بودیجې ورکول کيږي.
د دغې پروژې د عملي کېدو موده یو کال ښودل شوې ده.
د جواد پر خبره، د اوبو لګولو له دغوشبکو سره به ۱۵ زره جریبه ځمکه خړوبه شی.
د کرنې وزارت د معین پر وینا، داوبولګولو دغو شبکو سره به د اوبو ۴۰ سلنه ضایعاتو مخنیوی وشي او ورسره به شینې سیمې هم ۱۵ سلنه پراختیا پیدا کړي.
په همدې حال کې د کابل، پروان او لوګر د اوبولګولو ټولنې غړی عبدالقادر رباطي وايې، چې د دغو پروژو په عملي کیدو سره به تر دیره دکروندګرو ستونزې هوارې شي.
د رباطي پروینا، پر دغو پروژو به د ټولو ناحیو وګړي څار کوي او د اوبولګولو پروژو په بشپړيدو سره به له هغوی ساتنه هم کوي.
