د سلام وطندار موندنې ښيي، چې د کوه البرز په نوم یو ودانیز شرکت د کارګرانو ملي اتحاديې (امکا) نږدې ۱۰ میلیونو امریکايي ډالرو پانګه اختلاس کړې ده.
په ۱۳۸۹ لمریز کال کې د کارګرانو ملي اتحادیې او کوه البرز ودانیز شرکت تر منځ یو قرارداد لاسلیک شوی و، چې له مخې یې د اتحادیې په ۱۰ هکټاره ځمکه کې د استوګنې څلور بلاکونه ودان کړي.
د کارګرانو د اتحاديې د غړیو د ادعا او د هغو اسنادو له مخې چې سلام وطندار تر لاسه کړي، ښيي، چې د یاد شرکت له خوا د ۹۵ ودانیو د جوړولو ژمنه ورکړل شوې وه او اوسمهال یواځې ۵۰ ودانۍ یې اتحادیې ته ور سپارلي دي او د پاتې ودانیو له سپارلو سرغړاوی کوي.
د امکا او کوه البرز ودانیزو شرکت تر منځ د لاسلیک شوي قرارداد پر بنسټ د استوګنې کورنه له وړاندې د پیسو ورکولو په شرط د اتحادیې غړیو ته سپارل کېږي.
د کارګرانو د ملي اتحادیې رییس معروف قادري وايي، چې شرکت د استوګنې ۴۵ ودانۍ پلورلي دي.
که څه هم هغه ودانۍ چې شرکت باید اتحادیې ته سپارلې وای، برخلیک یې معلوم نه دی.
د کارګرانو ملي اتحادیې ځېنې غړو له سلام وطندار سره په خبرو کې وویل، چې پیسې یې د قرارداد سره سم د کورونو له سپارلو مخکې ورکړي دي، خو د کوه البرز شرکت له خوا د اتحادیې کورونه په نورو خلکو پلورل شوي دي.
ددوی په وینا ، چې دغه ودانیز شرکت د اتحادیې د غړیو د استوګنې یو، یو کور په څو تنو خرڅ کړی دی.
د کارګرانو ملي اتحادیې رییس وايي، چې د کوه البرز شرکت د اتحایې پر ځمکه په ناقانونه ډول دوه نورو بلاکونو د جوړولو چارې پیل کړي دي.
د دې شرکت د ادعا پر بنسټ دغه ودانۍ د اتحادیې پخواني رییس ستار پردلي او د شرکت پخواني رییس توریالي تر منځ د لفظي هوکړې له مخې شوي دي.
د قادري په خبره، د امکا او د شرکت پخواني رییس چې اوس دواړه بندیان دي، باید په دغو دواړو بلاکونو کې د جوړو شویو ودانیو ۶۰ ودانۍ یې اتحادیې ته ورکړل شوي وای.
دی وايي، تر دې چې د ده خپل کور هم د یوکال راهیسې د ډګروال محمد داود په نوم یو کس له خوا غصب شوی دی.
قادري وویل، چې داود ځان د ولسمشر غني د خپلوانو له ډلې معرفي کوي د خپلو ساتونکو په وسیله یې د ده کور نیولی دی.
د کارګرانو د ملي اتحادیې د چارواکو په خبره، د اتحادیې شاوخوا ۱۰ میلیونه ډالرو پانګه د کوه البرز شرکت له خوا حیف او میل شوې ده.
په ورته وخت کې د ملي دفاع وزارت هم د کارګرانو ملي اتحایې څخه څه باندې دوه میلیارده افغانۍ پوروړی دی.
د دې اتحادیې رییس وايي، چې د اتحایې ۷ جریبه ځمکه ملي دفاع وزارت ته په کرایه ورکړل شوې ده، چې دغه وزارت ۱۲کلونه کېږی د دوی پیسې نه دي ورکړي.
سلام وطندار هڅه وکړه، چې د کوه البرز ودانیز شرکت نظر هم واخلي خو د دغه شرکت چارواکو له سلام وطندار سره په دې هکله له خبرو کولو ډډه وکړه.
