د پکتيا پوهنتون لس کاله مخکې د دارالمعلمين په يوه زړه ودانۍ کې د ښوونې او روزنې او کرنې دوه پوهنځي لرل او د پوهنتون په نوم ودانۍ نه وه.
خو اوس د مرکز ګردېز په شمالي څنډه کې د پکتيا پوهنتون ګڼې اداري او تدريسي ودانۍ لري.
مدني فعالان او ځایي خلک وايي د دې پوهنتون ډېرې برخې د کروندګرو، عامو خلکو او سوداګرو په مالي لګښت جوړې شوېدي.
د پکتيا اوسېدونکی حقمل مسعودزی وايي، له زدهکړو سره د خلکو د مینې زیاتوالی او علاقه د دې لامل شوی چې د خپل جېب نه یو څو روپۍ د علمي او کادري ځایونو لهپاره هم ورکړي.
يو شمېر مدني بنسټونه هم د پوهنتون رغونې او پراختیا لهپاره د مرستو جلبولو کې د عامه پوهاوي پروګرامونه مخته وړي.
مدني فعالان جمعه ګل افغان او ډاکتر سميع الله احمدزی تر ډېره ملي سوداګر او بډايه خلک له پوهنتون سره مرستې ته هڅوي.
دوی د ملي سوداګرو تر څنګ په مدني ټولنو هم غږ وکړ چې نور له خېلونو او قومي تعصبونو څخه راو وځي او د پکتيا فرهنګي او اکاډوميک بنسټونه ورغوي چې د علم په سیالۍ کې له سیالانو سره سیال شي.
د پکتيا پوهنتون ریيس ډاکتر سيدولي جلالزي سلام وطندار ته وويل، د دې پوهنتون د نيمګړيو دېوالونو رغول، د پوهنتون دننه پلیو لارو جوړول، د پوهنتون د ښکلا لهپاره د بېلابېلو ونو کېنول، د اوبو را ايستلو لمريز برېښنايي سيستم جوړول او يو شمېر ټرانسپورټي موټرو رانیول د خلکو او سوداګرو په مرستو برابر شويدي.
ښاغلی جلالزی وايي، د پوهنتون ځېنې بلاکونه د کروندګرو ته د بدیل معیشت لهپاره پر هغو ورکړل شویو پیسو جوړ شوي چې د خپلو کارونو پرځای د پوهنتون پرمختګ ته ځانګړې کړې.
د پکتيا پوهنتون په ۸ پوهنځيو کې شاوخوا ۶ زره محصلان پر زدهکړو بوخت دي چې ۱۵۰ یې نجونې دي.
چارواکي وايي، د ولس او حکومت په همکاري به څو کاله وروسته دغه پوهنتون له مخکښو پوهنتونونو وشمېرل شي.
