د هرات، غور او پروان ولایتونو سیمهییزو چارواکیو نن د ۱۳۹۸ ښوونیز کال د پرانستې مراسمو پر مهال په یادو ولایتونو کې د ښوونې او روزنې پر بهیر نیوکه وکړه.
دغه چارواکي وايي، ماشومان د بېلابېلو لاملونو، لکه ناامنۍ، د زورواکیو لاسوهنې، د ښوونکیو نامسلکيتوب، د کورنیو او د پوهنې چارواکیو د نه پام له امله ښوونځي ته له تلو محروم شوي او یا هم د ښوونې او روزنې کیفیت ټیټ دی.
د غور والي غلامناصر خاضع د ښوونې او روزنې پر ټیټ کیفیت، په ښوونځي کې د ښوونکیو او زده کوونکیو پر نه موجودیت او د کورنیو له لوري له ښوونځیو نه د ماشومانو پر منع کولو د نیوکې ترڅنګ، د دغه ولایت د پوهنې ریاست له فعالیتونو ناخوښي څرګنده، مسوولان یې په مدیریتي کمزورۍ تورن او ټینګار یې وکړ چې سږ کال ورته د ښوونځیو کمزوری مدیریت ورته د منلو نهدی.
اړوند مطالب:
د غور ۷۰ سلنه ښوونځي ودانۍ نهلري
هرات؛ درېیو کلونو کې ۱۰۰ زرو ماشومانو ښوونځي پرېښي
په هرات کې له ۴۰ زیات ښوونځي تړلي دي
په همدې حال کې د پروان د پوهنې رییس عبدالظهور حکیم د دغه ولایت د پوهنې په چارو کې د زوراکیو پر لاسوهنو نیوکه وکړه. نوموړي وویل، د خلکو په مرسته به هڅه وکړي چې په نوي ښوونیز کال کې د زورواکیو د ناقانونه لاسوهنو مخه ونیسي.
د هرات د پوهنې رییس روحالله ازهد بیا په دغه ولایت کې له ښوونځیو نه د هغو ۳۰۰ زرو ماشومانو د محرومیت خبر ورکوي چې ښوونځي ته د تلو په شرایطو برابر، خو ترې بېبرخې دي.
د نوموړي په وینا، له دوو اونیو راهیسې یې د یادې ستونزې د حل په موخه د دولتي او نادولتي بنسټونو په مرسته کمپاین پیل کړی دی.
د یادونې ده چې نن په ټول هېواد کې نوی ښوونیز کال په ځانګړیو مراسمو پیل شو.
