د پکتيا ولايتي چارواکي وايي، د دغه ولایت له مرکزي زندان نه اووه بندیان تښتېدلي چې درې یې د وسلهوالو په لیکو کې د ترهګریز فعالیتونو، یو یې له وطن سره د خیانت، یو د قتل، یو د ترور او یو بل بیا د فرېبکارۍ په جرم په یاد زندان کې بندیان وو.
د چارواکیو په خبره، دا تښتېدلي بندیان تېره شپه د ماسختن د ۷ تر ۹ بجو پورې مهال کې تښتېدلي دي.
مسوولان وايي، لومړني مالومات دا دي چې دوی له لمانځه وروسته له جومات نه لادرکه دي او ټاکل شوی پلاوی به د دې پېښې پلټنه وکړي.
د پکتيا د والي مرستیال عبدالولي سهي وايي، د بندیانو د تښېتې په تړاو پلټنې روانې دي او تر بشپړېدو وروسته به یې په اړه مالومات شریک کړي.
د پکتيا د زندان عمومي مدير سمونوال محمداجمل له رسنيو سره په خبرو کې وويل، پېښه د پوليسو د بېپروايي او بېغوري له امله شوې او په اړه یې له پلټنې وروسته له رسنيو سره مالومات شريکوي.
د وسلهوالو طالبانو ویاند ذبېحالله مجاهد پر خپلې ټویټرپاڼې لیکلي، د دې ډلې اووه بنديان د پکتيا له مرکزي زندان نه په تکتیکي توګه تښتېدلي او اوس په یوه خوندي ځای کې دي.
د ګردېز په زندان کې د شپږ سوو په شاوخوا کې مجرمان بندیان دي چې د بېلابېلو ولایتونو اوسېدونکي او په بېلابېلو جرمونو محکوم شوي دي.
