/images (6).jpg)
د پکتیا ولایت اوسېدونکي وايي، د تېر په پرتله د دغه ولایت په ۳وو ځدراڼ مېشتو ولسوالیو کې امنیتي وضعیت ښه شوی دی.
د دوی په وینا، ښواک، ګردهڅېړۍ او وزي ځدراڼ هغه ولسوالۍ دي چې پخوا پهکې حقاني شبکه فعاله وه او ډېر کله به ترې د ناامنیو او جګړو راپورونه ورکول کېدل، خو اوس پهکې امنیت د ډاډ وړ دی.
د یادو ولسوالیو اوسېدونکي د ګردېز ـ خوست سړک جوړېدل، د خلکو او دولت ګډه همکاري او په یادو ولسوالیو کې د کمپاین په نوم د امریکايي ځواکونو ځایپرځای کېدل، د امنیت ټینګښت اصلي لاملونه بولي.
د دغو ولسوالیو اوسېدونکي سلیمان او بهادرګل وايي، په بشپړ ویاړ له دولت سره همکاري کوي او په یادو ولسوالیو کې عسکر، مامور او انجینر تګراتګ کولی شي.
بلخوا د ښواک ولسوال نیازمحمد خلیل او امنیې قومندان بریالی احمدزی وايي، د امنیتي ادارو ترمنځ ښه همغږي په وزي ځدراڼ او ګردۍڅېړۍ ولسوالیو کې د امنیت ښه کېدو لامل شوې ده.
دوی خلکو ته ډاډ ورکوي چې د دوی په همکارۍ به یې شپه او ورځ امنیت وساتي او هېچا ته به اجازه ور نهکړي چې یادې ولسوالۍ ناامنه کړي.
که څه هم له تېرو څو کلونو راهیسې د پکتیا په ښواک، ګردهڅېړۍ او وزي ځدراڼ ولسوالیو کې امنیتي وضعیت د ډاډ وړ دی، خو ښوونیز وضعیت یې سم نهدی او په تېرو ۱۷ کلونو کې یې یوازې د دولسم ډولګیو یوه دوره فارغان ورکړي دي.
