د پوهنې وزارت د سواد زدهکړې معین سردارمحمد رحیمي کابل کې د سواد زدهکړې نړۍوالې ورځې په مناسبت جوړې شوې غونډې ته وویل، د افغاني ټولنې لویه برخه نالوستې ده او داسې ټولنه کې باید رسنۍ ستر رول ولوبوي.
ښاغلی رحیمي وايي، له تخنیکي اړخه رسنۍ مثبتې خو د اطلاع رسولو برخه کې کمزورې دي چې ځېنې وخت د ملي ګټو پر خلاف راپورونه خپروي او ډېری وخت رسنۍ خپله په دې نه پوهېږي چې ټولنې ته څه وړاندې کوي.
د ده په وینا، ان ځېنې رسنۍ له نورو ځایونو هدایت کېږي او ځېنو وختونو کې د اطلاعاتو ازادي د ټولنې په زیان ده، پهداسې حال کې چې نیت به یې داسې نه وي.
په همدې حال کې د خپلواکو رسنیو ملاتړ د ادارې د پروګرامونو مسوول نوید محمدي وویل، په وروستیو ۱۵ کلونو کې رسنۍ ډېرې شوېدي او په همدې پیمانه یې د سواد زدهکړې برخه کی ښه رول لوبولی دی.
هغه وايي، د پوهنې وزارت څه موده مخکې ۳۴ ولایتونو کې خپلو ادارو ته مکتوب استولی چې پرته د پوهنې له رییس بل څوک حق نهلري چې رسنیو سره مرکه وکړي یا هم ورسره معلومات شریک کړي.
ښاغلی محمدي زیاتوي، د نی ادارې په باور دا مکتوب په څرکنده توګه د اساسي قانون او معلوماتو ته د لاسرسي له قانونه سرغړونه ده چې دوی پهدې اړه پوهنې وزارت ته مکتوب هم استولی او ورنه غوښتي يې دي چې پهدې اړه غور وکړي.
خو د پوهنې وزارت د سواد زدهکړې معین د نی ادارې مکتوب په اړه بېخبري ښيي او وايي، ولایتونو کې باید د پوهنې ریاستونو لومړي کسان رسنیو سره اطلاعات شریک کړي، نه د دغو ادارو ماموران.
د سواد زدهکړې نړۍواله ورځ پهداسې حال کې نمانځل کېږي چې دا مهال د افغانستان شاوخوا ۶۰ سلنه له ۱۵ کلونو لوړ عمرلرونکي نالوستي دي چې د پوهنې وزارت د سواد زدهکړې معین وايي، دوی پهدې اړه نوي پلانونه لري او شونې ده چې راتلونکیو لسو کلونو کې د سواد زدهکړې کچه ۱۰ سلنه نوره هم لوړه شي.
