د پروان ولايت د روغتون او عامې روغتيا رياست ۳ باوري سرچينې د نوم نه خپراوي په شرط سلاموطندار ته وايي چې د سېلابونو له کبله د اوښتې مرګژوبلې په اړه د پروان د ملکي روغتون د رهبرۍ له لوري د شمېر ورکړه ناسمه ده.
د سرچينو په وينا، هغه شمېر جسدونه چې روغتون ته ور وړل شوي او هغه شمېر چې رسنيو سره شريک شوی ۱۰ نه تر ۱۲ جسدونه توپير لري او همداراز د ټپيانو شمېر کې هم توپير دی چې روغتون ته وړل شوي ټپيان او رسنيو سره يې شريک شوي شمېر کې ۱۵ ټپيان توپير کوي.
د پروان ولايت د ملکي روغتون د نرسنګ مدير محمد صادق وايي، سره له دې چې د قربانيانو د شمېر نوملړ د دوی دنده ده؛ خو دې ولايت کې د سېلابونه له راوتو وروسته د يادو قربانيانو شمېر او د نوملړ جوړولو مسووليت د روغتون امر پر غاړه اخيستی دی.
د ياد ولايت د عامې روغتيا رييس صفيالله وارسته د يادو تورونو په اړه څه نه وايي خو زياتوي چې ياد تورونه ډېرې څېړنې ته اړتيا لري.
د پروان ولايت د مدني ټولنې مسوول محمد شفیع مشفق د يادو شمېرو په اړه اندېښنه ښيي او وايي چې دا کار بايد د بېړنيو حالاتو د کمېټې له لوري ترسره شوای وای.
د ياد ولايت والي فضلالدین عیار وايي، ښايي يو شمېر کسان له دې وضعيته ګټه واخلي؛ خو هغه ميکانيزم چې جوړ شوی ډېر ژر به د فاسدانو له مخ نه نقاب لرې کړي.
د پروان د ملکي روغتون امر عبدالقاسم سنگین سلاموطندار ته وايي، د ياد بنسټ په ټولو کارونو کې په ځانګړې توګه د جسدونه په ثبت کې کشفي او امنيتي ارګانونه حضور درلود او جسدونه له بشپړې پېژندنې او ثبت وروسته تابوت کېدل.
د نوموړي په وينا، د چهارشنبې تر مازديګره پورې د سېلابونو له کبله د مړو شويو او ټپيانو شمېر ۱۱۶ او د ټپيانو ۱۲۸ ته لوړ شوی و.
د پروان ولايت د ملکي روغتون د مسوولانو له لوري د قربانيانو د خيالي شمېرو ادعا په داسې حال کې مطرح کېږي چې حکومت د سېلاب د هر قرباني کورنۍ ته ۵۰ زره افغانۍ ځانګړې کړې دي.
