د ولسې جرګې د شکایتونو اورېدو کمېسیون د ټرانسپورټ وزارت د سړک د ټرانسپورټ رییس شیخاحمد متین د فساد په تور لويې څارنوالي ته ور وپېژنده.
د دغه کمېسیون رییس محمدصادق قادري وايي، په وار وار د سړک د ټرانسپورټ په اداره کې د شته فساد په اړه ورته شکایتونه رسېدلي او ځینو ټرانسپورټي شرکتونو ورته ځینې سندونه هم سپارلي دي.
قادري وویل، دوی څلور ځله د یادې ادارې د ټرانسپورټ لرونکیو د ستونزو شریکولو په موخه د شکایتونو اورېدو کمېسیون غونډو ته وربللی، خو په وینا یې، هغه یادو غونډو ته نه دی ورغلی.
د هغه په وینا، د سړک د ټرانسپورټ ادارې پر رییس د فساد، د پیسو په بدل کې د یو شمېر تنقیص شويو کارکوونکیو پر دندو ګومارل او له ټرانسپورټ لرونکیو نه په ناقانونه توګه د پیسو اخیستو تور دی.
نوموړي زیاته کړه، د کمېسیون یو پلاوی وزارت ته ورغلی و، خو د شیخاحمد متین ورکړي ځوابونو د پلاوي قناعت نه و ترلاسه کړی.
دغه راز د ځمکني ټرانسپورټ د انسجام شورا رییس طلامحمد اتمانزي د ولسې جرګې د شکایتونو د اورېدو کمېسیون غونډې ته وویل، شیخاحمد متین د ټولو ټرانسپورټ لرونکیو کارونه په خپلو ادارو کې بند کړي او سندونه یې هم نه نوي کوي.
نوموړی وايي، په جعلي پارچو په هر بندر کې له دوی نه له ۳ تر درېنیم زره افغانیو پورې په ناقانونه توګه اخلي چې دا پیسې د دولت خزانې ته نه ځي.
خو د ټرانسپورټ وزارت ویاند عليسینا ساحل بیا پر شیخاحمد متین لګېدلي تورونه ناسم بولي او وایي، که د ولسي جرګې د شکایتونو اورېدو کمېسیون سندونه لري، وړاندې دې یې کړي.
ساحل زیاتوي، په وزارت کی فساد نشته او د ټرانسپورټ پیسې چې پخوا د کتابچې په وسیله اخیستل کېدې، اوس د کارت له لارې بانک ته تحویلېږي او د فساد ځای پهکې نه دی پاتې.
د یادونې ده چی تر دې وړاندې هم د ولسي جرګې د شکایتونو کمېسیون لهخوا په وار وار د فساد په تور یو شمېر حکومتي چارواکي لويې څارنوالي ته ورپېژندل شوي وو، خو هېڅ برخلیک یې معلوم نه شو.
اړوند مطالب:
کابل ښاریانو ټرانسپورټ وزارت، د ټرافیکو مدیریت او ښاروالي ته ټنبللیک ورکړ
د ټرانسپورټ وزارت ۶۰ مامورین د فساد په تور څارنوالۍ ته ورپېژندل شوي
