د ټاکنو خپلواک کمېسیون نن د ولسي جرګې د ټاکنو نېټه اعلان کړه، خو حکومت وايي، چې د ټاکنو اوسني کمېسیون د دغو غړیو په حضور کې ټاکنې نه کوي.
د ټاکنو خپلواک کمېسیون وايي، چې د ولسي جرګې او ولسوالیو شورا ګانو ټاکنې د راتلونکي زېږدیز کال د تلې میاشتې په ۲۴مه نېټه پیلوي، خو له بل لوري د حکومت اجرایه رییس عبدالله وايي، چې له ټاکنیز سمون پرته د ټاکنو پیلول شونې نه دي.
د ټاکنو خپلواک کمېسیون رییس احمد یوسف نورستاني نن (دوشنبه) کابل کې په یوې خبري غونډه کې وویل، چې دغه کمېسیون به د قانون له مخې ټاکنې پیل کړي او له ټولو هغو کسانو یې وغوښتل، چې غواړي د ولسوالیو شوراګانو او ولسي جرګې ته ځان نوماند کړي؛ خپلې تابیاوې ونیسي.
نورستاني له حکومت او نړیوالې ټولنې څخه د راتلونکو ټاکنو د امنیت خوندیتوب او مالي لګښت د تامین غوښتنه وکړه.
د دغه کمېسیون رییس له دولتي بنسټونو، رسنیو او ګوندونو غوښتل چې د ټاکنو خپلواک کمېسیون سره دې مرسته وکړي.
د ټاکنو خپلواک کمېسیون رییس وايي، چې د اساسي قانون د ۴۳ مادې پربنسټ دوی مکلف دي، چې د ټاکنو د پیل له نېټې ۱۸۰ ورځې مخکې د ټاکنو موده اعلان کړي.
نورستاني ټولو افغانانو ته ډاډ ورکړ، چې دوی د تېرو ستونزمنو ټاکنو درس اخیستی او را تلونکې ټاکنې به په کمېسیون کې د سمون را منځته کولو په اساس وکړي.
ده وویل، چې له دې وروسته به په خپلواک ډول کار وکړي او هیچا ته به د دې اجازه ور نه کړي، چې د کمېسیون په چارو کې مداخله وکړي.
خو په ورته وخت کې اجرایه رییس د وزیرانو شورا په نوبتي غونډه کې وویل، چې د ټاکنو په خپلواک کمېسیون کې سمون رامنځته کول حتمي دي؛ د ولسي جرګې او ولسوالیو شورا ګاڼو د ټاکنو ټولې چارې به د ټاکنو نوی کمېسیون له لوري پر مخ یوسي.
ده، افغانانو ته ډاډ ورکړ، چې راتلونکو ټاکنو چارې به اوسنۍ کمېسیون پر مخ یو نسي.
د حکومت د ټاکنو خپلواک کمېسیون ته په ورلېږل شوي جدول کې وړانديز کړی و، چې د راتلونکو ټاکنو نېټه دې د ۱۳۹۶ز کال د غویي میاشتې په ۱۶ نېټه اعلان کړي.
له بل لوري د حراست او ثباټ شورا د ټاکنو خپلواک کمېسیون له خوا د ټاکنو ڼېټې اعلانول نامسولانه کار بولي او وایي، چې افغانان او نړیواله ټولنه د ټاکنو بې کفایته مدیرانو ملاتړ نه کوي.
