د بادغیس ولایت لسګونو اوسېدونکو او د ولایتي شورا غړو په ولسي جرګه کې د دې ولایت استازي موسا جناب پر خلاف لاریون کړی دی.
اعتراض کوونکو سید موسا جناب د دغه ولایت د مېشتو قومونو تر منځ د نفاق پر خپرولو او له طالبانو سره یې په مرستې کولو تورن کړی دی.
خلکو له حکومته وغوښتل، چې په ولسي جرګه کې د موسا جناب استازیتوب باطل اعلان کړي او له کاره دې پسې واخلي.
د بادغیس ولایتي شورا رییس عبدالباسط صارم وویل، چې حکومت باید په ولسي جرګه کې د موسا جناب استازیتوب له منځه یوسي، تر څو په بادغیس ولایت کې د مېشتو قومونو او خلکو ترمنځ ستونزې له دې زیاتې نه شي.
د دې ولایت یو استوګن عبدالکریم وايي، له هغې ورځې چې جناب د ولسي جرګې وکیل شوی، هڅه کوي، خلک له یو بل لرې وساتي او د قومونو ترمنځ د نفاق اور بل کړي.
خو د ولسي جرګې غړي سید موسا جناب له سلام وطندار سره په اړیکه کې دغه تورونه رد او ویې ویل، چې لاریون د هغو سیمه ییزو چارواکو په ټونګ شوی، چې په خلاف کاریو کې لاس لري.
د جناب پر وینا، که لاریون کوونکي پر ده، اسناد لري نو ځواب ویلو ته چمتو دی. جناب وویل، "طالب مې د هېواد دوښمن دی او زه د طالب په خلاف یم."
دا داسې مهال ده، چې تر دې مخکې هم سلام وطندار داسې سندونه موندلي وو، چې له طالبانو سره یې د جناب اړیکې ثابتولې.
