د جرګې دویم نایب نذیر احمد احمدزي نن د شنبې په ورځ (ډېسمبر په ۵مه) نېټه د نبیل د ګوښه کېدو په اړه خپاره شوي راپورنه رد کړل، خو زیاته یې کړه، چې د دې جرګې اداري پلاوی په نېږدې وختونو کې له ولسمشر غني سره ګوري او په همدې لیدنه کې به د ملي امنیت د رییس په توګه د نبیل د پاتې کېدو موضوع مطرح کړي.
د ولسي جرګې د نننۍ غونډې مشري د دې جرګې د دویم نایب نذیر احمد احمدزي پر غاړه وه.
په ورته وخت کې د ولسي جرګې ځينې غړي وايي، داسې راپورونه خپاره شوي، چې ګواکې د بهرنیو کړیو له خوا هڅه کېږي، چې د ملي امنیت عمومي رییس له دندې ګوښه او پر ځای یې بل څوک راشي.
د ولسي جرګې یو شمېر غړو نن په خپله عمومي غونډه کې دا هم وویل، چې بهرنۍ استخباراتي کړۍ ځکه د نبیل د ګوښه کېدلو هڅې کوي، چې په افغانستان کې د هغوی پلانونه شنډوي.
د جرګې زیات شمېر وکیلانو په خپلو خبرو کې د ملي امنیت له عمومي رییس رحمت الله نبیل نه ملاتړ اعلان کړ او ویې ویل، چې د هغه ګوښه کېدل به د ملت په ګټه نه وي.
شاوخوا یوه اونۍ مخکې داسې راپورونه خپاره شوي وو، چې په نېږدې راتلونکې کې به د افغانستان د ډېرو وزیرانو تر څنګ د ملي امنیت عمومي رییس هم له دندې ګوښه او پر ځای به یې نوي کسان وګومارل شي.
همدارنګه ولسي جرګې د کابل ښار د هوا د ککړتیا په اړه یو شمېر چارواکي ورغوښتي دي.
ولسي جرګې د کابل ځای ناستی ښاروال، د چاپېریال ساتنې ادارې مرستیال او د ښار جوړونې وزارت مرستیال او ګڼ نور اړوند چارواکي د کابل ښار د ککړتیا او د هوا د خرابوالي په اړه ولسي جرګې ته د پوښتنو د ځوابولو له پاره وربللي وو.
د کابل ښاروالۍ ځایناستي ښاروال عبدالاحد واحدي ولسي جرګې ته وویل، چې په ټول کابل کې یې د خلکو په مرسته حشر پیل کړی دی.
د ده پر وینا، په راتلونکو پنځو ورځو کې به د ښار ډېرې سیمې له کثافاتو او مرداریو پاکې شي.
واحدي د کابل ښار د مرداریو د ډېروالي خبره مني، خو وايي، په کافي اندازه تجهیزات او د پرسونل کمښت یې هغه ستونزه ده، چې د دوی د کارونو په چټکتیا کې خنډ جوړوي.
د کابل ځایناستي ښاروال زیاته کړه، چې ۸۰۰ کارکوونکي نه شي کولی، چې ټول کابل پاک کړي.
ده زیاته کړه، چې کمه بودیجه او د لېږد- رالېږد وسایطو کمښت یې بېله ستونزه ده.
په ورته وخت کې د چاپېریال ساتنې ادارې مرستیال عبدالولي مدقق ولسي جرګې ته په راتلونکې کې د دغې ادارې د بېلابېلو پلانونو په اړه معلومات ورکړل.
مدقق وویل، چې د بودیجې کمښت او د ځېنو ادارو ترمنځ د همغږۍ نشتوالی د هوا د ککړتیا په موضوع کې مهم عناصر دي.
ده زیاته کړه، چې د ښه چاپېریال او پاکې هوا په اړه یې له نړیوالو سره ځېنې تخنیکي وړاندیزونه شریک کړي او د هغوی له خوا مثبت ځواب ورکړل شوی دی.
له دې سره هم مهاله د ښارجوړونې وزارت مرستیال امیرالدین سالک وايي، د دوی وزارت او د ولسمشر غني د سلاکار احمدضیا مسعود له خوا جوړ شوي کمېسیون په پام کې لري، چې وروسته له دې هغه کورونه چې نوې جوړېږي؛ ښاري قوانین او نزاکتونه په پام کې ونیسي.
خو د ولسي جرګې غړې او د بدخشان د خلکو استازې فوزيې کوفي د دې ادارو کارونو په روڼوالي انتقاد کوي او پر دوی تور پورې کوي، چې له یوې مخې غله، فاسد او نااهله دي.
کوفي د کابل پر ښاروالۍ تور پورې کړ او ویې ویل، چې د هوا د ککړتیا د مخنیوي او د کثافاتو په راکمولو کې د کابل ښاروالۍ هڅې بې ځایه دي.
د کوفي پر وینا، حکومت باید دوی ته وخت وټاکي او ورته وايي، چې په ټاکلې موده کې باید ټول ښار پاک کړي.
کابل د افغانستان د پلازمېنې په توګه هغه جغرافیايي موقعیت دی، چې په اوسني جوړښت کې یې شاوخوا ۱۰ میلیونه وګړي اوسېږي، خو د پاکوالي له پاره یې د یو معياري کانالیزاسیون د جوړېدلو اړتیا ليدل کېږي.
